DILI, STLTIMORLESTE.com – Ministeriu Saude (MS) halao lansamentu ba fatin rastreiu no tratamentu ba kankru serviks iha Sentru Saude Vera Cruz, hodi kombate ba kankru serviks iha Timor Leste.
Visi Ministru Fortalesimentu Institusionál Saúde, José dos Reis Amaral Magno dehan, kombate kankru serviks iha Timor Estratejia Global, neebe rekomenda husi Organizasaun Saude Mundial (OMS), hasoru Virus Papiloma Humana (HPV) mak vasina 90%, Rstreiu 70% no Tratamentu 90%.
“Iha loron 19 fulan Julhu 2024 halo lansamentu ba vasinasaun hasoru moras kankru neebe kauza husi Virus Papiloma Humana, Primeiru Ministru Kay Rala Xanana Gusmão mak lidera. Vasina HVP simu dala ida deit iha Timor Leste nia alvu labarik feto sira idade 11-14,” hatete Visi Ministru Fortalesimentu Institusionál Saúde, José. ba jornalista sira iha Sentru Saude Vera Kruz, Kinta (27/03/2025).
Governante nee enkoraja ba inan-feton sira atu ba utiliza servisu nee hodi hatene no foti medida apropriadu no sedu ba sira nia saude. Se ba imunizasaun nee konsege lori sira nia oan feto sira 90% idade 11-14 anos hetan vasina HPV.
“Hau enkoraja feto hotu-hotu ho idade 30-49 anos ba iha Sentru Saude Internamentu Vera Cruz, HNGV, SSK Formoza, SSK Tirilolo Baukau atu halo kontrolo ba imi nia saude hodi kombate kankru serviku,” nia esplika.
Nia informa, Ministeriu Saude halo kampanha no konsege vasina ona grupu alvu kuaze 90% no vasina uluk nee sira hetan gratuita husi nasaun Australia hamutuk ho WHO no UNICEF.
Iha fatin hanesan, Prezidente INSPTL, Merita Monteiro hatutan, iha lansamentu fatin rastreiu tratamentu ba kankru serviks iha Sentru Saude Vera Kruz nia nee, tanba papel INSP-TL mak fo formasaun ba pesoal saude sira neebe mak partisipa iha formasaun nee hamutuk nain 16.
“Ohin loron ita asiste hamutuk iha pesoal saude nain 16 mak ohin simu sertifikadu, tanba partisipa ona iha formasaun relasiona ho oinsa mak halo screaning ba iha kankru serviks hamutuk 16 neebe mak kompostu husi mediku espesialista nain 3, mediku jeral nain 3, iha Parteira nain 8 no mos iha analista nain 2,” nia informa.
Nunee, Visi Embaixador Australia ba Saude Global ka Delegadu, Edward Wilkinson relata, lansamentu klinika rastreiu no tratamentu foun iha klinika Vera Cruza nee marka etapa importante ida ba esforsu hodi kombate kankru serviku iha Timor Leste.
(jen)
