DILI, STLTIMORLESTE.com – Ministeriu Saude (MS) liu husi Ministra Saude, Elia dos Reis Amaral hasai karta sirkular ba mediku sira hodi limita mediku fo tratamentu ba pasiente sira iha klínika privadu iha oras livre, ida nee Visi Ministru Fortalesementu MS, Jose dos Reis labele koalia buat ida, importante mak mediku sira nafatin halo tratamentu ba povu bainhira presiza.
Visi Ministru Fortalesimentu ministeriu Saude, Jose Reis Magno hatoo kestaun nee ba jornalista sira bainhira partisipa seminariu nasional iha komemorasaun tinan 20 apoiu Global Fund mai Timor Leste iha Palasiu Prezidensial Bairo Pite, Tersa (03/12/2024).
Nia hatete, kona-ba MS liu husi Ministra Saude, Elia dos Reis Amaral hasai karta sirkular ba mediku sira hodi limita fo tratamentu ba pasiente sira iha klínika privadu iha oras livre nee, ida nee nia labele fo komentariu.
Jose dehan, karta sirkular nee nia labele hatan lai buat ida, mais tenke haree lai ba rezolusaun governu kona-ba eskluzividade ba profisionais saude sira nia knaar ka halao servisu, tanba maioria profisionais saude sira nee ba iha setor publiku, maibe halao knaar mos iha setor privadu.
Visi Ministru dehan, tenke haree didiak asuntu nee, kuandu rezolusaun sai ona tenke implementa, mais hanesan Governu nee la signifika katak halo susar profisonais saude sira, tanba mezmu halo nusa mos sira mak hanesan ezekutor ba programa hotu iha area saude iha Timor Leste. Governu nian intensaun nee atu dehan katak, parte hotu-hotu inklui profisionais saude sira tenke fo atensaun makaas liu ba iha povu nian xamada ka nesesidade.
Nia afirma, mediku sira nee importante tebes, tanba sira mak bele responde ba nesesidade povu nian, liu-liu oinsa atu fo atendimentu ba povu sira.
Iha loron 29 de Outubru 2024, Ministra Saude (MS), Elia dos Reis Amaral hasai ona karta sirkular ida ho konteudu fo prazu fulan ida atu instituisaun privada sira hapara kontratu ho mediku no profisionais sira seluk neebe servisu mos iha klínika privada sira, fora husi oras servisu normál.
Karta sirkular neebe Ministériu Saude hasai, tanba deskonfia mediku balu abandona pasiente iha Hospital Nasional Guido Valadares (HNGV) hodi ba halao servisu iha klínika privadu sira.
(eme)
