DILI, STLTIMORLESTE.com – Ministeriu Saude (MS) hamutuk Menzies Timor Leste realiza sosializasaun kona-ba Métodu Wolbachia ba membru Polisia Nasional Timor Leste (PNTL) hodi hatene no tutan informasau ba komunidade sira saida mak Wolbachia nomos Wolbachia nee atu halo saida.
Nia dehan, Ministeriu Saúde (MS) liu husi Diresaun Nasional Edukasau Promosaun Saude hamutuk ho Menzies Timor Leste mai iha Komando PNTL Munisípiu Dili kona-ba Métodu Wolbachia ba membru Polisia iha Komando Munisípiu Dili.
“Antes ita atu implementa Métodu Wolbachia lo-loos liu-liu ba Munisípiu Dili ita tenke halo sosializasaun ba komunidade nomos too instituisaun, tan ida nee mak parte PNTL importante tebes, liu-liu asegura implementasun programa, tanba ida nee ami fo informasaun ba sira atu nunee sira tenke hatene Métodu Wolbachia mak oinsa,” hatete Ofisial SBC (Social Behaviour Change) ba Programa CDC no Non-CDC – Diresaun Nasional Edukasaun no Promosaun Saúde iha Ministeriu Saude (MS), Estevão Mariz ba jornalista sira iha Komando PNTL Munisipiu Dili, Sesta (30/05/2025).
Nia tenik, sosializasaun ba membru PNTL nee importante tebes, tanba nee liu husi sosializasaun nee atu hasae sira nia konhesimentu Métodu Wolbachia ba membru polisia sira.
“Programa nee ita sei iha faze pereparasaun, saida-saida mak ita presiza atu halo mak ba iha adovokasia, sensibilizasaun nomos mobilizasaun iha komunidade, tanba nee ami nia ekipa hamutuk ho Menzies halo hela sosializasaun nomos halo mobilizasaun iha komunidade,” nia deklara.
Nia informa, sira mos iha atividade seluk neebe halao mak mobilizasaun avizu husi kareta neebe tama sai hela bairu-bairu sira fo informasaun kona-ba Métodu Wolbachia nee rasik.
“Iha Métodu nee rasik, ita sei implementa liu-liu ba prevensaun moras dengue, neebe ita sei husik susuk Wolbachia nee iha fulan Junhu too Novembru, depois ita sei halo monitoring fila-fali, serake susuk nee iha duni Wolbachia ga lae,” nia informa.
Iha fatin hanesan, Komandante Operasaun PNTL Munisípiu Dili, Superintendente Assistente Polísia José Luis Amaral esplika, Komando PNTL Munisipiu Dili agradese ba Ministeriu Saude (MS) ho Menzies Timor Leste fo ona sosializasaun kona-ba Métodu Wolbachia hodi kombate moras dengue iha Timor Leste (TL) nee importante tebes ba membru Polisia Komunitaria nomos membru Polisia OPS sira atu fahe tuta informasaun nee ba komunidade sira, tanba polisia komunitaria nee besik liu komunidade.
“Hau hanoin sira mai halo sosializasaun kona-ba Métodu Wolbachia nee importante tebes-tebes ba ita nomos ba komunidade, liu-liu ba Polisia Komunitariu sira, sira mak bele liu komunidade, sira bele fahe tutan informasaun neebe komunidade, atu nunee susuk nee wainhira sira husik iha ita nia rain, sira labele hakfodak,” nia afirma.
(jen)
