DILI, STLTIMORLESTE.com – Reprezentante Ministeriu Saude, Nusa Tengara Timur (NTT), Jeffray Jap husu ba Governu Timor Leste (TL) atu fasilita Laboratóriu Nasional (LABNAS) ho ekipamentus neebe mak diak no adekuadu, hodi bele fasilita pesoal saude sira halao teste ba sampel moras daet sira ho lais, nunee bele hetan prevensaun no atendimentu neebe mak lais, nunee labele prejudika ema nia vida.
“Governo TL bele buka meus oinsa kapasita laboratóriu neebe mak diak liu tan, nunee ba oin kualker sampel bele halo deit iha nee, neebe normalmente tenke lais atu nunee ita mos bele halo atendimentu neebe lais mos ba moras neebe mak daet liu husi imunizasaun, tanba nee diak liu teste halo iha rai laran, tanba TL nee hanesan nasaun ida neebe mak kiik, kuandu iha ona ekipamentus neebe mak adekuadu, teste laboratóriu nee ita halo loron ida ou rua deit, ita bele hetan ona rezultadu,” hatete Reprezentante MS Nusa Tengara Timur, Jeffray Jap ba jornalista sira iha Novu Turizmu, Tersa (15/10/2024).
Nia esplika, relasiona ho relatoriu Minsteriu Saude nian hateten, preokupasaun no dezafiu neebe mak sira enfrenta durante nee, falta ekipamentus laboratóriu teste sampel moras hadaet sira neebe durante nee haruka ba Tailandia.
Nia esplika, Governu Timor Leste iha kompetensia tomak atu fasilita fasilidade saude liu-liu LABNAS Timor Leste ho ekipamentus neebe mais modernu no rigorozu, atu nunee bele fasilita pesoal saude sira liu-liu tekniku laboratoriu sira bele halao sira nia servisu ho diak liu tan, aleinde bele halais prosesu teste bele minimiza mos administrasaun ba teste sampel iha rai liur.
Iha fatin hanesan, Xefe Departementu Imunizasaun Ministerio Saude, Onna Perreira deklara, preokupasaun neebe mak durante nee sira enfrenta mak falta ekipamentus iha laboratóriu, hodi obriga hakarak ou lakohi sampel ba moras daet sira durante nee tenke haruka ba rai liur, liu-liu ba Tailandia.
(jen)
