DILI, STLTIMORLESTE.com – Ministeriu Saude (MS) liu husi Diresaun Nasionál Farmasia Produtu Medikamentu (DNFPM) hamutuk ho parseiru sira hanesan Organizasaun Mundial Saude (OMS) iha Timor Leste (TL) no mos Organizasaun Mundiál iha SEARO no Therapeutic Goods Administration (TGA) Australia, halao avaliasaun referénsia ba hametin sistema regulatóriu TL.
Hatete Diretora Jeral Prestasaun Saude iha MS, Terlinda da Conceição Barros ba jornalista sira iha Ministeriu Saude Kaikoli, Díli, Segunda nee (17/03/2025).
Nia dehan, ekipa sira nee mai halo asesmentu ho nia objetivu mak medikamentu sira neebe mak tama mai TL tenke utiliza ba populasaun sira nee ho seguru, oinsa atu seguru liu tan presiza lao tuir padraun neebe mak iha.
“Ita nia kapasidade sei minimu tebes, tanba ita hatene katak kapasidade atu teste aimoruk iha rai laran seidauk iha, entaun TGA Australia mak kada tinan ajuda ita teste ita nia aimoruk nia kualidade tuir item neebe mak ita fo ba sira, entaun kada semestre item lima no tinan ida item 10 mak ita teste iha neeba,”.nia teknik.
Nia esplika, husi item sira nee DNFPM foti husi importador privadu sira no mos INFPM sira neebe mak iha indikasaun katak, iha problema ka ameasa saude komunidade nian, entaun haruka ba TGA Australia hodi halo konfirmasaun iha neeba.
“Depois sira halo asesmentu durante semana ida nia laran, ita nia nivel nee sae ba segundu ka terseriu, katak ita halao pratika ba farmasia medikamentu ba ita nia sidadaun sira atu seguru no kontrola sira diak liu, maske ita la bele kria fali moras ba sira, ida nee mak Ministériu Saude nia papel hodi kolabora ho OMS iha Timor no OMS iha Searo no TGA Australia neebe mak suporta ita nia sistema vijilansia no regulatoriu ba medikamentu sira nee,” nia deklara.
Iha fatin hanesan, Ofisial Tekniku ba Moras Hadaet no Moras Tropikal Neglijiadu iha Timor Leste, Debashish Kundu esplika, reforsu ba sistema regulador nee reflete komprensaun ida neebe klean kona-ba Governu nia papel krítiku neebe aimoruk sira halao, hodi salva guarda saude no bem-estar Timoroan sira nian.
“Hau iha serteza katak vizita avaliasaun referénsia nee uza instrumentu referensia globál OMS nian hanesan pasu ida tan ba avansu fornesimentu kuidadu saude iha Timor Leste, hodi halibur peritu sira, polítiku sira, no pontu fokál hotu-hotu husi instituisaun idak-idak, husi Ministeriu Saude hatudu ona ninia kompromisu no vontade atu harii sistema ida neebe metin, neebe tau sidadaun Timoroan sira nia moris diak iha ninia nukleu. Ohin, ita halibur iha nee atu delibera kona-ba asuntu sira ho importánsia boot liu ba sistema saude nasaun ida nian,” nia Informa.
Nia haktuir, sistema regulatoriu ida neebe rigorozu ba produtu mediku sira iha Timor Leste, importante tebes ba estabelesimentu fundasaun ida neebe metin ba sistema saude nasaun ida nian. Presiza nota katak, regulador sira maka parte esensial ida husi forsa trabalhu saude nian no sistema regulatoriu sira neebe efetivu mak komponente esensail ida husi sistema saúde sira no kontribui ba rezultadu saúde públika nian neebe diak liu.
Nia koalia, OMS prontu atu fornese perísia teknika no atu apoia Ministériu Saude iha ninia buka sistema regulatóriu ida neebe efetivu ba kuidadu saude. OMS lao hamutuk ho Ministeriu Saude no serbisu besik ho Diresaun Nasionál Farmásia no Medikamentu no instituisaun relevante sira seluk.
Nunee, reprezentante husi Laboratóriu Administrasaun Terapéutiku Austrália, Michael Wiseman, deklara serbisu kooperativu nee ajuda hametin sistema saude ida neebe forte hodi atende populasaun.
“Sistema regulatoriu neebe forte hanesan parte ida neebe krítiku no importante ba sistema saude. Se ita hakarak garantia ba ita nia sidadaun sira katak aimoruk neebe sira hemu loron-loron iha kualidade, entaun liu husi sistema regulasaun neebe diak no forte mak ita bele halo ida nee,” nia afirma.
(jen)
