DILI, STLTIMORLESTE.com – Governu liu husi Minsiteriu Saude (MS) hamutuk ho Organizasaun Mundial saude iha Timor Leste (TL), halao rastreiu kankru serviks ba Pesoal Saude feto, iha Hospital Nasionál Guido Valadares (HNGV) durante loron haat, hodi prevene no kontribui ba eliminasaun iha TL.
Diretora Jeral Kuidadu Saude Primaria iha Ministériu Saude, Elizbeth Leto-Mau hatete, globalmente komemora loron asaun ba eliminasaun kankru serviks iha loron 17 fulan Novembru kada tinan. Haree ba Kankru Serviks neebe hanesan kauza aas ba mortalidade inan feto sira iha Timor Leste ne’ebé sita iha relatoriu estatistika moras kankru global, no identifikasaun sedu husi selula prekankru bele prevene hodi kontribui ba eliminasaun kankru serviks iha Timor Leste.
Nunee atu komemora loron importante ida nee, Ministeriu Saude liu husi HNGV sei halao atividade rastreiu ba pesoal saude feto iha HNGV no mos sira ninia familia inklui parteira sira hanesan membru Asosiasaun Parteira Timor Leste neebe propoin atu halao durante loron ha’at hahú ohin too 29 novembru 2024.
“Kankru Serviks hamosu dezafiu signifikativu ba saude publika iha nivel globál no Timor Leste, estimativa ķatak iha tinan 2022, mate hamutuk 37 akontese iha nasaun ida nee, tanba kankru serviks. Rastreiu tuir tempu determinadu, bele deteta sedu lesaun prekankru no minimiza diagnosa iha faze ikus neebe hamosu prognostiku ladiak, reduz kustu aas ba tratamentu no numeru mortalidade,” hatete Elizbeth ba jornalista sira, iha HNGV, Kurta (27/11/2024).
Maibe nia dehan, iha loron 17 fulan Novembru kada tinan, Timor Leste komemora loron asaun ba eliminasaun kankru serviks.
“Hau orgulhu atu hatoo katak, depoiz de estabelesimentu sentru kolposkopia iha Baukau, Formoza, HNGV no tinan oin inaugura tan sentru kolposkopia iha Maliana. Iha tinan 2022 pesoal saude halo ona nastreiu ba feto maluk hamutuk 872 iha sentru kolposkopia sira no mos kampa rastreiu neebe estabelese durante loron saúde nasional iha Ermera no Naval. Iha fulan hira liu ba iha Kuarter Jeral F-FDTL no Baukau,” dehan nia.
Iha fatin hanesan, Ofisial Tekniku iha Organizsaun Mundial Saude iha Timor Leste, Ram Chahar dehan, atu mai hamutuk iha fatin ida nee hodi komemora loron asaun ba eliminasaun kankru serviks neebe kada tinan selebra iha loron 17 Novembru, lema ba tinan ida nee empasiza “Hasae traballador sira iha liña oin transforma kompromisu global sira ba asaun sira salva-moris nian.
Entertantu Diretora enfermajen no parteira HNGV, Maximiniana L.S. Ferrão esplika, atividade nee atu prevene kankru serviks ba inan feton sira, tanba nee Ministeriu Saude servisu hamutuk ho Organizasaun Mundial Saude iha Timor Leste mai iha HNGV atu halo rastreiu ba funsionariu feto sira neebe mak iha HNGV no la taka dalan ba familia feto sira iha oportunidade bele lori sira mai.
(jen)
