DILI, STLTIMORLESTE.com – Ministeriu Saude (MS) hamutuk ho Organizasaun Mundial Saude (OMS) halo enkontru masimu ba Autoridade Munisipal hodi hamosu politika no planu aksaun hodi kombate husi tabaku no fator risku seluk husi moras la hadaet.
“Timor Leste enfrenta dezafiu emerjente no komplexu kona-ba konsumu tabaku, neebe konstitui fator risku 70% ba moras la hadaet sira hanesan kankru, moras kardiovaskulares, diabetes no moras respiratorias krónikas,” hatete Visi Ministru ba Fortalesimentu Institusional Saúde (VMFIS), José dos Reis Magno ba jornalista sira iha Hotel Timor Dili, Tersa (25/03/2025).
Nia dehan, moras sira nee laos deit afeta ba sidadaun sira nia kualidade moris, maibe mos reprezenta naha todan signifikativu nia sistema saude no ekonomia nasionál.
Nia rekonhese ba realidade ida neebe Governu TL fo pasu importante hodi ratifika Konvensaun Kuadru Organizasaun Mundial Saude kona-ba kontrolu tabaku.
“Ita nia Parlamentu Nasional mos halo ratifikasaun ba Konvensaun OMS ninian liu husi rezolusaun n° 13/2004. 29 de Dezembru. Liu husi dekreto-Lei n° 14/2016, fo kompetensias ba Ministeriu Saude konaba Kontrolu Tabaku. Lei ida nee mak lori ita atu dezenvolve medidas sira hodi buka proteje populasaun husi suar aat tabaku, regulamenta komersializasaun no konsumu produtu tabaku, promove ambiente neebe saudável liu ba ita hotu-hotu,” nia tenik.
Nia esplika, implementasaun efikaz polítika sira nee depende ba kolaborasaun nivel governasaun hotu-hotu, inklui apoiu husi Prezidente Autoridade Munisipál sira.
Nia hatutan, reforsu ba edukasaun no sensibilizasaun, implementa kampanha kona-ba edukasaun iha eskola no komunidade sira, destaka risku kona-ba tabaku no nia benefisiu ba vida livre husi tabaku. Utiliza meius komunikasaun lokal sira, hanesan radiu komunitária rede sosiais, hodi disemina mensajen kona-ba prevensaun no kontrolu tabaku.
Nia deklara, regulamentasaun no fiskalizasaun neebe efikaz, apoia MS no Ministériu komérsiu no Indústria kona-ba fiskalizasaun importa faan ka komersializasaun produtu tabaku, hodi garante kumprimentu lei sira. Kontrola importasaun no kualidade produtus tabaku, evita entrada produtu tabaku ilegál sira.
No apoiu hodi hakotu fuma tabaku, kria sentru apoiu fumador iha munisipiu, oferese konsulta no tratamentu ba sira neebe hakarak husik fuma. Kapasita profisional saude sira hodi fornese akonselhamentu no akompanhamentu ba sidadaun sira ne’ebé hakarak husik sira nia vísiu fuma.
“Dalima, promosaun ba dalan alternativas ekonomikas sira seluk, servisu ho komunidade sira iha rural hodi dezenvolve alternativa ekonomika seluk, duke kuda tabaku, hanesan agrikultura sustentável ka turizmu komunitariu. Apoia komersiantes kiik sira ba tranzisaun atividades ekonómikas neebe la depende ba faan produtu tabaku. Implementa kampanha kona-ba edukasaun iha eskola no komunidade sira, ita destaka risku konaba tabagismu no nia benefisius ba ita nia vida livre husi tabaku,” nia informa.
Nia afirma, luta kontra tabaku ne’e responsabilidade kompartilhada ida. Enkuantu lideres munisipal sira no ema hotu iha poder atu influensia diretamente saúde no bem-estar ba komunidades sira. Implementasaun polítikas no planus asaun sira ne’e laos deit sei salva vida, maibé sei kontribui ba Timor Leste mais saudavel, mais produtivu no mais rezilente.
Iha fatin hanesan, Reprezentante Organizasaun Mundial Saude iha Timor Leste, Arvind Mathur esplika, eventu importante ida nee ba prezidente sira, Autoridade Munisípiu nian ba polítika, dezenvolvimentu kapasidade no planeamentu asaun nian ba kombate uzu tabaku no fatór risku sira seluk husi moras la hadaet iha TL.
“Hau rekonhese espesialmente ba ita boot nia prezensa testamentu hodi ita boot nia lideransa no kompromisu. Ho ita boot sira nia prezensa hanesan Prezidente Autoridade sira nian hatudu momos kompromisu koletivamente IX Governu Konstitusionál ba saúde no moris di’ak povu Timor Leste nian,” nia informa.
Nia koalia, ho hanoin katak ema sira nee barak liu mak tau sira nia aan iha risku ba moras sira ne’ebé ameasa moris, mate prematuru no defisiénsia. No mos uza tabaku sai nafatin kauza mate nian neebe bele prevene no sai hanesan motór prinsipal ba moras la hadaet sira.
(jen)
