DILI, STLTIMORLESTE.com – Ministeriu Saude (MS) hamutuk ho Organizasaun Mundial Saude (OMS) Timor Leste halao workshop kona-ba lista medikamentu esensial Timor Leste, hodi hasae kualidade atendimentu ba populasaun sira iha TL.
Kestaun nee hatoo husi Visi Ministru Saude Fortelisimentu Institusional Saude, Jose dos Reis Magno ba jornalista sira, iha Otel Timor, Dili, Sabadu (19/10/2025).
“Asesu ba aimoruk no vasina sira mak pilar ida husi kobertura saude universal no esensial ba atinjimentu sira, workshop nasional ba atualiazasaun lista medikamentu esensia Timor Leste ba edisaun da-haat ida nee ho objetivu, atu hasae kualidade atendimentu ba populasaun sira iha ita nia rain,” hatete Jose.
Ministeriu Saude tuir Jose haksolok aprezenta edisaun da-haat neebe kompletamente revizaun no atualizadu ba lista medikamentu esensial sira.Ai-moruk iha papel importante iha prestasaun servisu kuidadu saude nian, nunee selesaun ba ai-moruk apropriadu neebe povu timoroan presiza nuudar atividade ida neebe fundamental no dinamiku husi Ministeriu Saude.
“Lista aimoruk nee tuir rekomendasaun husi Organizasaun Mundial Saude (OMS) no kondisaun Timor Leste nian, tuir prinsipiu no konseitu sira aimoruk esensial nian hodi simplifika jestaun fornesimentu aimoruk nian no apoia sistema lojistika ida neebe optimizadu. Edisaun da-haat ida nee husi lista medikamentu esensial sira 2024 nian sai, hanesan rezultadu husi prosesu konsultivu ida neebw makaas ho input husi maioria profisional saude sira iha nasaun,” nia esplika.
Maibe nia dehan, fornesedor kuidadu saude hotu-hotu sei uza dokumentu ida nee,tanba nee kontinua sai hanesan instrumentu importante ida iha jestaun ai-moruk nian iha nasaun, Adezaun rigorozu ba lista durante preskripsaun, dispensasaun, aprovizionamentu, no distribuisaun sai nafatin ezijensia obrigatoriu ida.
Iha fatin hanesan, Diretor Nasional Farmasia Produtu mediku (DNFPM), Delfim Ferreira esplika, workshop nasional ba konsultasaun final ba esbosu lista medikamentu esensial ba edisaun da-haat ida nee, Ministeriu Saude ho OMS atualiza lista medikamentu esensial TL ba edisaun da-haat.
Nia dehan, organiza atu bele hetan opiniaun final husi mediku espesialista sira husi director ospital sira profisional saude sira.
“Workshop nasional ba konsultasaun final ba esbosu lista medikamentu esensial ba edisaun da-haat ida nee, Ministeriu Saude organiza atu bele hetan opiniaun final husi ita nia mediku espesialista sira,” dehan nia.
Entretantu Reprezentante Organizasaun Mundial Saude Timor Leste, Arvind Mathur deklara, lista medikamentu esensial sira hanesan pilar vital ida ba Polítika Nasional ba Medikamentu sira, tanba ida nee garante katak, servisu kuidadu saude nian sira ekipadu ho rekursu nesesariu sira hodi fornese kuidadu diak liu ba sidadaun hotu-hotu.
“Ami hakarak Lista Ai-moruk Esensial ba Timor Leste ka the Essential Medicines List for Timor Leste (EMLTL) sai instrumentu indispensavel ida hodi promove aprovizionamentu ai-moruk sira neebe rasional no kustu-efetivu,” nia informa.
(jen)
