DILI, STLTIMORLESTE.com – Ministeriu Saude (MS) hamutuk ho Organizasaun Mundial Saude no Fundu Global (Parseriu sira) halao Workshop, atu dezenvolve estratejia nasional expansaun oksijeniu no pulsu oximetriku ba Timor Leste (TL).
“Ministeriu Saude konsege hamutuk ho ita nia parseiru Organizasaun Mundial Saude no Fundu Global atu harii plata oksijeniu iha rai laran, nunee ba futuru ita la bele hola tan,” hatete Visi Ministru ba Operasionalizasaun Hospital, Flávio Brandão Mendes de Araújo ba jornalista sira iha Novu Turizmu, Dili, Kuarta (04/12/2024).
Bainhira TL tuir Flávio produz rasik oksijeniu mak Governu sei la hasai osan atu sosa tan, tanba nee agradese ba tekniku sira husi OMS no Fundo Global sira nia apoiu.
Maibe objetivu husi workshop nee mak atu halo estartejia, oinsa mak halo produsaun, distribuisaun no manutensaun, depois estratejia atu uza husi profisional saude sira oinsa atu iha rasional hodi uza oksijeniu sira nee ho diak, tanba oksijeniu nee parte ida husi aimoruk neebe uza halo tratamentu ba pasiente, entaun tenke uza halo didiak hodi fo rezultadu diak ba saude iha TL.
Iha fatin hanesan, Reprezentante Organizasaun Mundiál Saude, Arvind Mathur deklara, ohin halibur hamutuk iha nee hodi dezenvolve estratejia nasionál expansaun oksijeniu no pulsu oximétriku ba Timor Leste, avansu boot ida atu asegura disponibilidade sustentavel ba oksijeniu no ba sistema fornesimentu oksijeniu.
No vantajen ida husi pandemia Covid-19 mak hatudu ba mundu vulnerabilidade global husi sistema fornesimentu oksijeniu. Maioria hospital sira iha nasaun ho rendimentu kiik no mediu (LMIC)/low- and middle-income countries (LMICs) la hetan asesu ba terapia oksijeniu, ho deit estimativa 20% husi pasiente sira neebe presiza oksijeniu mediku mak bele simu.
Entretantu Adminsitadora Fundu Global iha Timor Leste, Madalena Hanjam koalia osan neebe mak Fundo Global apoiu iha situasaun Covid-19 ba Timor Leste nee hamutuk milhaun US$ 5, husi nee Governu gasta milhaun US$ 4 no hela milhaun US$ 1 hodi uza ba oksijeniu tanba atu utiliza ba pasiente sira iha Timor Leste.
Maibe Fundo Global halo ona tenderizasaun ba empreza sira no empreza internasional husi Portugal mak manan ho naran ultra kontrolu, no nia sei too iha nee tempu badak atu halo instalasaun ba oksijeniu iha Manatuto.
(jen)
