DILI, STLTIMORLESTE.com – Daudaun nee Diresaun Nasional Farmasia no Medikamentu iha Ministeriu Saude (MS) haruka ona karta ida ba responsavel armajen nasional no rejional sira atu hapara distribuisaun sasan sira hanesan Ferroz Gluconate 60 Mg no Folic Acid 2.800 mcg ba sentru no postu saude sira.
“Sasan rua nee troka kor, ami nia ekipa INFPM hasai karta ida atu fahe ba pasiente sira, ami suspende hela sasan rua nee iha stok armajen nasionál no munisipal nian, ami haruka ona karta ofisial iha loron 23 Maiu,” hatete Diretor DNFM, Delfin Ferreira ba jornalista sira iha Palasiu das Cinzas Kaikoli, Tersa (27/05/2025).
Nia dehan, responsavel nee relata, sasan rua nee kompostu husi batch ualu, mak hanesan 223121324, 223121325, 223121326, 223121327, 223121328, 233121468, 233121469 no 233121470 .
Nia esplika, aimoruk sira nee atu fo ba inan isin rua sira neebe afeta raan menus. Bainhira husu kona-ba Ministeriu Saude iha item medikamentu seluk atu hatan ba nesesidade pasiente ospital nian, Diretor nee hatete katak Ministeriu Saude iha ona aimoruk seluk atu hatan ba nesesidade unidade ospital sira nian.
“Ita nia aimoruk item rua nee oferese husi Ajensia Nasoins Unidas ba Dezenvolvimentu Labarik (UNICEF) iha tinan 2023,” nia deklara.
Iha fatin hanesan Diretora Jerál Servisu Ospitalár, Terlinda Barros esplika, Ministeriu Saude sei investiga kauza husi mudansa kor iha aimoruk sira nee.
“Iha kauza ba mudansa kor hanesan prosesu produsaun, armazenamentu ka transporte. Hirak nee iha problema barak iha prosesu nia laran,” nia informa.
Nia haktuir tan, aimoruk sira neebe fahe tiha ona ba pasiente sira nee kualidade diak, tanba nee husu atu populasaun sira labele paniku ba aimoruk sira neebe sira hemu tiha ona.
Tuir informasau katak, iha tempu badak aimoruk item rua nee ba teste kualidade iha Laboratoriu Therapiutic Goods Administration Australia.
(jen)
