DILI, STLTIMORLESTE.com – Visi Primeiru Ministru, Ministru Koordenador Asuntu Sosial, Ministru Dezenvolvimentu Rural no Habitasaun Komunitaria, Mariano Assanami Sabino husu ba Ministeriu Saude (MS) atu hadia fasilidade saude sira, liu husi kompleta ekipamentu mediku iha Sentru Kardiaku Lahane, nunee bele funsiona.
Nia dehan, agora daudaun edifisiu sentru kardiaku Lahane diak ona, maibe tenke iha fasilidade neebe adekuadu.
“Hospital iha Lahane nee diak, maibe ita presiza prienxe, tanba nee ita presiza integra buat importante tolu iha laran, dahuluk mak konstrusaun uma, ekipamentu médiku neebe presiza atu hadia pratika modernu relasiona ho situasaun atual, no seluk mak jestaun no rekursu umanu, tanba pakote tolu nee importante tenke organiza ho diak, nunee hospital ida bele funsiona ho diak,” hatete Assanami ba jornalista sira iha Palasiu Cinzas, Kaikoli, Dili, Kinta (05/12/2024).
Maibe nia dehan, fasilidade ba Pesoal Mediku sira mos importante tebes, tanba too oras nee pasiente barak neebe halo referal ba hospital iha rai liur hanesan Indonezia, Singapura no Malazia hodi halo tratamentu gasta ona osan barak, nunee ho fasilidade neebe adekuadu Governu TL bele poupa liu tan.
Tanba nee husu ba Ministeriu Saude atu servisu hamutuk laos deit hadia sistema saude, maibe hadia mos fasilidade saude neebe oras nee presiza.
No hein katak iha futuru hospital sira iha Maubisi, Maliana no Baukau sei iha mos mediku espesialista ba korasaun no kankru, no seluk tan, nunee pasiente sira mos bele halo referensia ba hospital rejional sira.
(jen)
