DILI, STLTIMORLESTE.com – Ministeriu Solidariedade Sosial no Inkluzaun (MSSI) realiza serimonia asina akordu ho Instituisaun Solidariedade Sosial (ISS), hodi fo apoiu ba proposta hamutuk 39, mai husi Grupu Instituisaun Uma Mahon, Orfonatu, Sentru Komunitariu no Area Defisiensia sira.
Kolokasaun orsamentu ba apoiu nee mai husi Orsamentu Jeral Estadu tinan 2025 hamutuk US$ 2.000,000 ba 39 Propostas neebe hatoo iha husi ISS.
Ministra Solidariedade Sosial no Inkluzaun, Veronica das Dores hateten, tinan nee Governu halo akordu ho ISS fo apoiu ba grupu ka instituisaun neebe mak tau matan ba ema vulneravel sira, tanba sira hanesan matan tilun ba estadu.
“Iha tinan nee ita selebra tan akordu ida no hau lori Instituisaun Solidariedade Sosial sira hotu, ita iha instituisaun lubuk ida neebe mak nuudar liman ain Governu nian, neebe mak tau matan ba ita nia maluk vulneravel sira no feto faluk oan sira, ba sira neebe mak hasoru problema desigual no diskriminasaun defisiensia no labarik sira neebe mak presiza ajuda liu-liu iha sentru komunitariu sira,” hateten MSSI, Veronica das Dores iha Salaun Ministerial MSSI Kaikoli, Dili, Segunda nee (17/03/25).
Ministra nee mos hateten, apoiu nee hanesan Governu tau matan ba liman ain sira, hodi tau matan ba vitima sira, tanba nee MSSI nia papel la boot liu, maibe oinsa ita hotu hamutuk atu tau matan ba oan sira no ita nia familia sira neebe mak hasoru problema sosial.
Nunee mos MSSI agradese ba instituisaun hamutuk 38 neebe mak simu apoiu nee, tanba sira hanesan eroi hodi tau matan ba defisiensia sira.
Iha fatin hanesan, Visi Primeiru Ministru, Ministru Koordenador Asuntu Sosial no Ministru Dezenvolvimentu Rural no Habitasaun Komunitaria, Mariano Assanami Sabino Lopez hateten, apoiu hanesan prinsipiu fundamentu ida, tanba nasaun nee independensia tau matan ba ema no investe ba ema, tanba nasaun nia pontesia mak ema.
“Hau hanoin ninia prinsipiu para ita fundamentu, ita fo atensaun ba vulneravel sira, ba orfan sira, ba Sentru Komunirariu sira, ba Uma Mahon sira, tanba iha ita nia Konstituisaun mos koalia, ita nia planu estratejiku mos ita koalia katak ita tenke investe ba ema, ema mak ita nia rikusoin, ema ita nia potensia atu estadu nee ba oin, maibe iha ema balu neebe mak mai ho situasaun neebe mak diferente,” hateten Vise Primeiru Ministru, Mariano Assanami Sabino Lopez.
Governante nee salienta tan katak, investimentu ba ema mak sai alvu prinsipal ba iha IX Governu Konstitusional, liu husi nee mak ita bele reforsa liu tan oinsa atu apoiu atu lalika husik ema ida iha kotuk, ema hotu tenke dezenvolve hanesan Sosiedade Timorense.
Visi Primeiru Ministru nee mos hateten katak, maske Timor Leste iha rekursu oin-oin hanesan Minarai inklui rikusoin seluk neebe mak nasaun nee iha, maibe rikusoin neebe mak fundamentu atu hodi nasaun nee ba oin mak ema.
“Tanba nee hanesan reprezenta Estadu nia katak, Governu nafatin iha komitmentu atu fo apoiu liu husi MSSI atu bele halao nia papel nee nuudar parte ida mai apoiu solidariedade, maske apoiu refere kiik maibe Governu nafatin esforsu atu hadia iha futuru,” katak Mariano.
Enkunatu apoiu orsamentu ba tinan fiskal 2025 nee ho total US$ 2.000,000, kolokasaun ba instituisaun vulneravel sira mak hanesan Uma Mahon Hamutuk US$ 509,967.65 ba proposta hamutuk 9, Orfonatu hamutuk US$. 282,147 86 ba proposta hamutuk 6 , Sentru Komunitaria ho total US$ 660,233.68 ba proposta hamutuk 11 no ba area Defisiensia nia ho total 5.547,650.82 ba propoata hamutuk 12.
Entretantu hola parte iha ekipa avaliasaun ba proposta hirak nee mai husi Grupu Trabalhu, MSSI, PDHJ, FONTIL GASC, INDDICA no GIA-MSSI.
(EST 3)
