DILI, STLTIMORLESTE.com – Ministra Solidariedade Sosial no Inkluzaun (MSSI) Veronica das Dores apoiu ai-haan ba vulneravel hamutuk 87 iha Suku Uma Kaduak, Postu Administrativu Laclo, Munisipiu Manatuto.
Tuir informasaun neebe STL asesu husi pajina Facebook MSSI, Domingu (08/02/2026) hatete, apoiu nee distribui direta husi Ministra MSSI, Veronica das Dores, iha Sede Aldeia Raibutigeon, Sabado (07/02/2026).
Maluk vulneravel sira neebe hetan apoiu ai-han mak hanesan idozus neebe hanaran erois vivus, ema ho defisiensia, inan isin rua, feto faluk ho oan abandonadu, familia iha sirkunstansia sosial no uma kain kbiit laek.
Ministra Solidariedade Sosial no Inkluzaun (MSSI) Veronica das Dores sujere ba foin sae sira atu hadomi malu liu husi hakribi violensia, no evita envolve iha grupu artemarsiais, nunee bele konsentra deit ba estuda no aprende.
Governannte nee mos ba Xefe Suku Uma Caduac, Fermino Ribeiro da Cruz, bainhira atu foti dadus maluk vulneravel, labele haree ba kor (partidu), rasa eh grupu tanba governu taumatan ba ema hotu-hotu hanesan.
“Nai Xefe Suku, Xefe Aldeia sira, labele halo diskriminasaun bainhira foti dadus maluk vulneravel,” tenik Ministra nee.
Fatin hanesan Xefe Suku Uma Caduac, Fermino Ribeiro da Cruz, hatoo apresiasaun no agradesimentu ba Ministra, tanba mesmu estrada aat no distansia dook, maibe tanba Ministra nia domin boot tebes ba maluk Vulneravel sira, nunee Ministra lori ona ai-han oituan ba maluk vulneravel sira hodi hatutan moris ba loron ida ka rua.
Antes kontinua vizita ba Suku Bua, Ministra pesoalmente hataan kedas pedidu husi katekista Domingos de Paulo, liuhusi apoiu fundus oituan hodi sosa sementi ba hadia Igreja Raibutigeon neebe daudaun nee adianta hela prosesu finalizasaun tanba kestaun tekniku.
Nunee mos João Soares nudar familia husi maluk vulneravel neebe simu apoiu nee hatete, agradese ba governu, liu-liu ba MSSI neebe ho laran luak ajuda no apoiu ona aihan ba maluk sira neebe presiza tebes tulun.
“Ita haree maluk sira ho kondisaun hanesan nee laos deit iha fatin ida nee, maibe iha fatin seluk mos barak mak presiza hela tulun husi nai ulun sira. Neebe husu ba nai ulun sira presiza tun ba iha baze, liu-liu area rurais sira nee, tanba maluk barak mak sei moris ho kondisaun hanesan nee,” dehan nia ba STL iha Lahane, Domingu (08/02/2026).
Nia hatutan, kondisaun moris ema nian nee la hanesan, balun bele moris susar maibe iha familia balun sei tau netik matan, maibe balun lae liu. Tanba nee bainhira governu fo tulun no apoiu netik buat ruma nee, sira senti kontenti tebes.
Tanba nee husu ba governu no estadu tenke tau matan no tulun povu kiik sira neebe presiza tebes tulun, atu nunee sira mos bele senti katak furak husi ukun aan ida nee nian.
(dom)
