BAUKAU, STLTIMORLESTE.com – Ministeriu Solidariedade Sosial no Inkluzaun (MSSI) apoiu nesesidade bazika ba Ema ho Defisiensia (EhD), iha ambitu selebrasaun loron mundial EhD neebe selebra iha Munisipiu Baukau.
Xefe Programa iha MSSI Baukau, Júlio Alexandre António Belo hateten, iha selebrasaun loron mundial ba Ema ho Defisiensia Governu liu husi Ministeriu Solidariedade Sosial, halo asaun karidade ba maluk Ema ho Defisiensia sira iha Munisipiu Baukau, nuudar simbolu domin no valoriza loron Ema ho Defisiensia.
“Ita nia intensaun distribuisaun nesesidade bazika ba ita nia maluk Ema ho Defisiensia nee, hanesan asaun karidade neebe ita halo valoriza loron maluk Ema ho Difisiensia sira,” Alexandre hateten ba jornalista sira, hafoin selebra loron mundial EhD iha salaun Sentru Konvensoens, Vila Antiga, Baukau, Kuarta (03/12/2025).
Nia informa, apoiu nesesidade baziku neebe Ministeriu iha ba maluk Ema ho Defisiensia sira iha Baukau mak hanesan fos saku kilograma 25, sabaun, mina tein, no sasan seluk tan neebe bele auguenta ba nesesidade loron balu nian.
Nia sublina, sasan hirak nee kada Ema ho Defisiensia hetan foos saku kilograma 25 ida ho sasan seluk, neebe benefisiariu iha apoiu refere liu ema nain 80.
“Bazeia ba ita nia konvidadus husi Postu kada Postu ida ema nain 10, maibe Postu Baukau Vila Mak ema nain 13 tanba iha Suku 13, entaun asan neebe mak ohin ita halo asaun karidade ba ita nia maluk sira mak ema ida foos saku ida,” Alexandre komenta.
Prezidente Autoridade Munisipiu Baukau, Veneranda Lemos parabeniza ba Ema ho Difisiensia iha territoriu nasional neebe selebra nia loron Mundial. No konsidera EhD laos definitivamente Defisiente, maibe espesial tebes, tanba Defisiensia iha fiziku, maibe iha mentalidade matenek, tanba nee hahu kedas husi primeiru Governu too Governu dasia nafatin tau atensaun ba EhD liu husi Parlamentu Nasional ratifika konvensaun EhD sai lei Nasional iha Timor-Leste hodi entidades hotu garante EhD nia moris no direitu tomak.
“Tanba nee iha Governu MSSI no Sekretariu Estadu no Igualidade entaun laiha tan ona razaun atu dehan ita terus, ita susar ita laiha ema atu tau atensaun maibe ita nia Governu tau atensaun aas tebes liu husi programa lubuk ida hanesan ita boot sira hatene,” Veneranda katak.
Benefisiu EhD, Jacinta Catarina agradese ba Ministeriu Solidariedade Sosial no Inkluzaun, tanba bele fo apoiu nesesidade bazika ba EhD hodi auguenta nesesidade iha loron balu, maibe husu atu fo apoiu ekipamentus alfaeate nian.
“Hau agradese ba apoiu nee maibe labele apoiu deit mak foos, tanba hau iha konhesimentu atu loke alfaeate maibe hau nia ekipamentus laiha prezisa apoiu mak hau husu apoiu makina suku, hodi tau iha Postu Vemasi hakarak halibur hau nia maluk ema ho difisiensia,” nia katak.
Entretantu Ema ho eifisiensia iha Munisipiu Baukau neebe sai benefisiariu ba apoiu nesesidade bazika hamutuk nain 83 husi Postu Administrativu 8 neebe eziste iha Baukau. Enkuantu selebrasaun loron mundial EhD neebe realiza iha Baukau, hetan partisipasaun masimu husi familia EhD no Autoridade sivil no Militares sira.
Jornalista: Tomas Reis
Editora: Carme Ximenes
