BAUKAU, STLTIMORLESTE.com – Ministeriu Solidariedade Sosial no Inkluzaun (MSSI) apoiu nesesidade baziku liu husi programa distribuisaun ai-haan pakote komplementar ba benefisiariu hamutuk nain 300 iha Postu Administrativu Baukau Vila, Munisipiu Baukau.
Ministra Solidariedade Sosial no Inkluzaun, Verónica das Dores esplika, distribuisaun ai-haan pakote komplementar programa husi IX Governu Konstitusional neebe enkaixa iha MSSI neebe apoiu ona benefisiariu sira iha territoriu nasional, hahu kedas iha tinan 2023 too ohin loron, neebe prioridade ba benefisiariu sira husi familia vulneravel, idozu abandonadu, Eroi Vivos no Ema ho Defisiensia.
“Objetivu apoiu ai-haan pakote komplementar nee IX Governu nia programa kedas, liu-liu maluk EhD nomos ita nia inan aman ferik katuas sira,” hateten Ministra nee ba jornalista sira, bainhira remata simbolika entrega ai-haan komplementer ba benefisiariu sira iha Suku Buibau, Sesta (11/07/2025).
Governante nee sublina, objetivu husi apoiu refere la konsidera benefisiariu sira kiak liu, maibe apoiu ba sustentabilidade neebe bele diminui benefisiariu sira nia problema liu-liu iha nesesidade baziku loron balun nain.
Nia fundamenta, objetivu seluk husi apoiu nee mos hakarak lori besik Governu ba povu iha baze, haree problema sira neebe povu enfrenta liu-liu nesesidade baziku ho urjente.
“Benefisiariu neebe mak iha lista fornese nee mai husi Xefe Aldeia, Xefe Suku, servisu hamutuk ho diretor asuntu sosial Baukau nian, ami bele fo apoiu ba sira, ai-haan sira neebe ami apoiu foos, mina, koto, supremi, deo, sardina, susu been, biskuit, foremungu,” Ministra akresenta.
Governante nee katak, Governu liu husi MSSI kontinua halo vizita ba komunidade iha territoriu nasional hodi ajusta iha planu hodi fo apoiu hanesan.
Autoridade Munisipiu Baukau liu husi Sekretaria Munisipal Asuntu Sosial, Maria Celestina Viegas agradese ba apoiu refere, tanba Governu liu husi MSSI bele inisia programa refere hodi ajuda benefisiariu sira.
“Planu IX Governu nian liu husi Ministra bele mai nafatin besik aan iha baze atu bele haree direitamente ita nia inan aman sira, ema ho kondisaun espesial sira iha Suku no Aldeia sira atu nunee bele hamutuk hodi atende komunidade sira,” hateten Maria Celestina Viegas.
Benefisiariu Cris husi Aldeia Loidua’a, Suku Buibau nee agradese ba Governu, tanba bele fo apoiu ai-haan komplementer.
“Hau kontente no agradese ba Governu, tanba ohin ami simu ida nee uza ba loron balun no husu Governu ba tan para simu hanesan ami,” nia sujere.
Benefisiariu nee husu Ministeriu relevante atu kontinua implementa programa refere, nunee bele fo benefisiu ba komunidade seluk neebe kondisaun hanesan seidauk hetan apoiu hanesan husi Governu.
Entretantu programa distribuisaun ai-haan pakote komplementar ba benefisiariu hamutuk nain 300 kompostu Suku Buibau aprezenta benefisiariu 150, Suku Samalari aprezenta benefisiariu 150, neebe serimonia refere realiza iha Suku Buibau.
(tom)
