DILI, STLTIMORLESTE.com – Ministeriu Solidariedade Sosial no Inkluzaun (MSSI) liu husi Institutu Nasionál Seguransa Sosial (INSS) ohin halo sosializasaun kona-ba lei seguransa sosial ba membru FALINTIL-Forsa Defeza Timor Leste (F-FDTL).
“Husu ba ita boot sira atu atentu didiak kona-ba lei seguransa sosial, tanba nee ita nia maluk sira mai husi seguransa sosial mai fahe sira nia informasaun neebe diak, tanba durante nee ita hotu preokupa ba lei seguransa sosial, ita koalia ita nia osan fulan fulan koa nee ba neebe, tebes ga lae aban bainrua ita reforma ita sei hetan ita nia direitu ga lae,” hatete iha diskursu Xefe Gabinete Xefe Estadu Maior Jenerál F-FDTL Koronel Marcelino Ximenes “RIZAI” ba jornalista sira liu husi nia diskursu iha salaun auditoriu Kuartel Jenerál F-FDTL, Fatuhada Dili, Kinta (22/05/2025).
Nia husu ba militar sira atu atensaun didiak kona-bá lei seguransa sosial neebe sei fahe husi ekipa sira husi INSS.
“Ida nee mak ohin sira nain hira iha nee sei fo informasaun ba ita hotu, iha nee ba ofisiais superior, Subalternos, Sarjentu no prasas sira, iha nee sira sei fahe lei neebe iha, sosializaun ida nee imi tenke atensaun didiak, ita nia maluk sira fo ba ita kona-ba lei Seguransa Sosial nian,” nia tenik.
Nia informa, militar bele hatene lei, entermus seidauk apar kona-ba situasaun ida nee, iha mundu ema barak tau hanesan nee mais kada nasaun iha diferente.
“Ami atensaun didiak, ba ita nia maluk sira, asesor sira sei fahe esperiensia ba ita, pesoalmente imi fila fali ba imi nia komponente, imi fahe fila fali ba imi nia maluk sira seluk,” nia deklara.
Iha fatin hanesan, Membru F-FDTL, David Ximenes informa, informasaun kona-ba sosializaun ba lei seguransa sosial nee persiza hatene, tanba Governu koa ona osan, maibe seidauk komprende kona-ba lei nee rasik.
“Hau hanoin informasaun neebe ami militar sira simu kona-ba sosializaun ba lei Seguransa nee importante tebes ba ami, atu nunee ita bele komprende, tanba saida koa ita nia osan, no aban bairua ita reforma nee ita simu duni ita nia direitu ga lae, ida nee ita persiza hatene duni,” nia afirma.
(jen)
