BAUKAU, STLTIMORLESTE.com – Ministeriu Solidariedade Sosial no Inkluzaun (MSSI) hamutuk ho Klibur Defisiensia Tilun Timor Leste (KDT-TL) selebra loron mundial ba sinal jestual, ho atividade dialogu iha Munisipiu Baukau neebe ho tema ”Koalia ho Ami nia Liman no Rona ho Ami nia Matan”.
Diretora Ezekutiva Klibur Defisiensia Tilun Timor Leste, Crecensia Madeira de Deus agradese ba Governu Timor Leste, liu-liu MSSI nomos Governu Australia liu husi Asosiasaun Defisiensia Timor Leste, tanba bele apoiu KDT-TL hodi selebra loron mundial lian jestual iha Baukau.
“Loron ohin importante ba komunidade difisiensia tilun iha Timor Leste, tanba loron nee proklama iha assembleia ONU hanesan loron mundial ba lian jestual,” hateten Crecensia liu husi diskursu bainhira selebraloron mundial ba sinal jestual neebe realiza, iha salaun Sentru Konvensoens Vila Antiga, Buakau, Tersa (23/09/2025).
Tanba tuir nia KDT-TL harii iha tinan 2018 inisiativa mai husi Ema ho Defisiensia tilun sira rasik no sai sumbrinha husi Asosiasaun Difisiensia Timor Leste neebe iha tinan nee sai membru ba MSSI hodi promove no advoka partisipasaun Ema ho Difisiensia tilun sira nian iha prosesu dezenvolvimentu.
Nunee loron 23 Setembru nuudar loron importante ba komunidade Ema ho Defisiensia tilun sira iha mundu selebra loron refere, neebe komunidade Ema ho Defisiensia tilun iha Timor Leste tinan nee selebra ba dala tolu iha Munisipiu Baukau lori domin besik ba maluk hotu.
“Ami Defisiensia tilun konsidera ita hotu neebe ohin partisipa iha momentu ida nee, imi mak ema espesial ba ami komunidade Defisiensia tilun iha Timor Leste, tanba ohin selebra loron mundial iha Baukau,” Crecensia akresenta.
Iha fatin hanesan, Diretor Nasional Suportador Defisiensia husi MSSI, Domingos R. Maia konsidera, loron refere importante ba Ema ho Defisiensia tilun sira iha mundu, tanba selebra loron refere neebe deside liu husi asembleia jeral iha ONU nuudar loron prinsipal ba Ema ho Defisiensia tilun sira iha mundu.
“Loron 23 Setembru loron mundial ba lian jestual ohin iha Timor Leste ita hamutuk iha Baukau selebra loron importante ida nee, Timor ratifika ona konvensaun ONU direitu Ema ho Defisiensia, konvensaun ida nee rekonhese sinal jestual hanesan meius komunikasaun atu komunika malu,” Domingos katak.
Diretor nee argumentu, Timor Leste ratifika direitu Ema ho Difisiensia tuir konvensaun ONU nian, tanba nee selebrasaun refere tuir konvensaun ONU nian no rekoinhese sinal jestual mak meuis ida neebe bele komunika entre Ema ho Difisiensia tilun no Ema Difisiensia tilun ho komunidade kondisaun normal.
Maibe nia dehan, Governu konsidera loron nee importante, tanba nee MSSI nafatin servisu hamutuk ho organizasaun Ema ho Difisiensia sira hotu nafatin kria politika liu husi planu asaun ba ema difisiensia neebe Governu TL aprova ona iha tinan 2022.
Entretantu Reprezentante Diretor Ezekutivu Asosiasaun Difisiensia Timor-Leste, Vitorina Sarmento Sávio parabeniza maluk Ema ho Defisiensia tilun sira iha Mundu espesialmente iha Timor Leste, tanba loron 23 Setembru loron importante ba sira.
“Ita hotu hatene katak, Defisiensia tilun mak ita nia maluk sira neebe labele rona no labele koalia, entaun komemora ida nee atu hafanu ema hotu ema Defisiensia mos iha direitu hanesan kolega sira seluk,” nia hateten.
Vitorina husu sidadaun sira hotu atu nafatin respeita maluk Ema ho Difisiensia sira hotu, tanba sira mos kriatura hanesan ita.
Entretantu seremonia selebrasaun prezensa masimu husi sidadaun Defisiensia tilun sira no konvidadus husi Komando Polisia Munisipiu Baukau deit, enkuantu Autoridade Munisipiu no Postu Baukau Vila la marka prezensa.
Jornalista: Tomas Reis
Editora: Carme Ximenes
