DILI, STLTIMORLESTE.com – Ministeriu Solidariedade Sosial no Inkluzaun (MSSI) liu husi Diresaun Nasional Asistensia Sosial, servisu hamutuk ho Ministeriu Saude no Programa Ai-han Mundial (PAM/WFP), kontinua halao sosializasaun ba Programa Bolsa da Mãe Kondisional-Saude Nutrisaun Inan no Oan (BdMK-SANUTRIO) ba Autoridades Lokais Munisipiu Kovalima.
Eventu nee hetan abertura husi Sekretariu Asuntu Finansas Munisipiu Kovalima, Alberto Moniz de Araújo, iha Sentru Evakuasaun Dezastres Munisipiu Kovalima, Tersa (20/01/2026).
Tuir informasaun neebe STL sita husi pajina Facebook MSSI, Kuarta (21/02/2026) hatete, iha abertura Sekretariu Administrasaun no Finansas, Autoridade Munisipiu Covalima, Alberto Moniz de Araújo husu ba autoridade lokal sira atu habelar informasaun sira neebe hatooo husi parte MSSI, Ministeriu Saude, inklui PAM/WFP liga ho programa SANUTRIO ba komunidade sira iha baze, nunee bainhira programa refere implementa, bele benefisia komunidade liuliu benefisiariu sira.
Entretantu, Diretor Jeral Protesaun Sosial, Floréncio Pina Diaz Gonzaga, husu ba Autoridade Lokal atu servisu hamutuk hodi kontribui ba implementasaun Programa BdMK-SANUTRIO, nunee bele halo prevensaun ba mal-nutrisaun, liuliu oinsa bele halakon raes badak ou stunting iha Timor Leste.
(dom)
