BAUKAU, STLTIMORLESTE.com – Ministra Solidariedade Sosial no Inkluzaun (MSSI), Verónica das Dores, parabeniza FALINTIL – Forsa Defeza Timor Leste (F-FDTL), tanba bele fornese uma dignu ba familia vulneravel neebe prezisa.
Tuir Ministra nee katak, konstrui uma dignu ba familia vulneravel sira neebe konstrui husi F-FDTL iha selebrasaun FALINTIL ba dala 50 nee furak no diak liu, tanba oferese uma ho kondisaun fiziku 100% ba benefisiariu sira neebe konstrui ho valor orsamentu rihun US$ 15.
“Ita hotu nuudar Timor oan tenke fo parabens ba ita nia Forsa Defeza liu liu parte enjenaria neebe mak halo servisu neebe kualidade tebe tebes,” hateten Ministra Verónica das Dores ba jornalista sira hafoin remata inagura uma dignu ba familia vulneravel iha Vila Nova Baukau, Domingo (01/02/2026).
Governante nee konsidera, uma neebe F-FDTL konstrui ba familia vulneravel mesmu ho valor orsamentu rihun US$ 15, maibe konsege konstrui too finaliza ho progresu fiziku kualidade, tanba tuir loloos uma modelu refere kompostu kuartu toba fatin 3, sala vizita 1, sala jantar 1 kompleta ho keramik no plafon inklui konstui tan dapur no fatin sanitariu.
Tuir nia katak, loloos nee susar atu jere osan rihun US$ 15 iha konstrusaun refere, maibe parte F-FDTL konsege konklui no entrega ba benefisiariu sira, tanba jestaun mak diak, nunee sei aprezenta rezultadu refere iha Konselhu Ministru.
“Tenke aprezenta iha Konselhu Ministru para servisu nee entre ligadu, tanba ami Sosial halo uma ba familia kbiit laek presu la liu husi rihun US$ 5, agora Forsa Defeza halo uma hanesan nee Sr. Ministru orienta katak labele liu husi rihun US$ 15, tanba ida nee mak ita apresia,” Ministra Verónica komenta.
(tom)
