DILI, STLTIMORLESTE.com – Ministeriu Transporte no Komunikasaun (MTK) ho parseiru Asian Development Bank (ADB) lansa estudu viabilidade ba transporte publiku.
“Iha fulan Maiu tinan kotuk, halibur malu hodi fo sasin ba lansamentu planu ba transportes publiku nian, ohin ita halibur malu fali hodi fo sasin ba lansamentu relatoriu estudu viabilidade nian neebe hetan apoiu husi ADB, iha tempu hanesan Governu mos inisia daudaun prosesu prepara Deteils Engineering Design hodi bele aselera prosesu implementasaun iha tinan sira tuir mai, eventu ida ohin laos atu hatudu deit katak ita iha ona estudu viabilidade ba fasilidade transportes publikus iha Timor Leste, maibe liu-liu hatudu dalan oinsa mak reorganiza ita nia transportes publiku, ita nia fasilidades sira neebe presiza iha setor transportes publiku no hatudu kompromisu ida ho vizaun dook, ba ita nia rain nia dezenvolvimentu iha setor nee,” hatete MTK, Miguel Marques Goncalves Manetelu ba jornalista sira iha Hotel Novu Turizmu, Lecidere, Dili, Sesta nee (10/01/2025).
Nia dehan, setor transporte, setor ida neebe vital tebes-tebes ba iha rai ida nee nia dezenvolvimentu, iha IX Governu Konstitusional nia programa, ba setor ida nee define katak, atu kria kondisaun ba kresimentu ekonomiku, hadia no aumenta sirkulasaun ema no sasan nee fundamental hodi implementa vizaun neebe hatur ona iha Planu Estratéjiku Dezenvolvimentu (PED) 2011 – 2030.
Tanba nee, nuudar Ministru responsavel ba setor halo esforsu hotu-hotu atu hadia, moderniza no dezenvolve liu tan setor transportes, liu-liu ba transportes públikus hodi hatan ba demanda populasaun nian.
Maibe mos, buka hatur vizaun ida atu Transportes Públiku iha TL sai atrativu, assesivel no inklusivu, ho moda transportes oin-oin, neebe bele apoiu ba kresimentu ekonomiku, dezenvolvimentu urbana, no hasae kualidade moris Timor oan sira iha nasaun tomak.
Iha fatin hanesan, Diretor Nasional ADB Timor Leste, Stefania Dina hatete, Governu TL estabelese ona enkuadramentu vizaun ida atu liga komunidade sira no hadia dezenvolvimentu sosio-ekonomiku liu husi rede estrada ida neebe forte.
Tanba nee iha vizaun ida nee nia laran mak nesesidade urjente ba sistema transporte públiku ho kualidade aas neebe serve povu TL, Banku Dezenvolvimentu Aziatiku (ADB) sente orgulhu atu apoia inisiativa ida nee, laos deit atu promove kresimentu ekonomiku, maibe mos atu asegura inkluzaun, sustentabilidade no reziliensia klimatika iha infraestrutura transporte.
(joa)
