DILI, STLTIMORLESTE.com – Ministeriu Transporte no Komunikasaun (MTK) promove transformasaun Edukasaun Dijital, liu husi kolaborasaun estratejiku ho Telkomcel no Google Indonezia.
Iha loron Segunda (25/08/2026) MTK Timor Leste nian hamutuk ho Telkomcel, ho orgulhu atu fo sai kolaborasaun ho parseiru estratejiku Telkomcel nian, Google Indonesia, hodi sai uma nain ba seminariu ida ho títulu “Driving Digital Transformation in-Timor-Leste: Aproveita Plataforma abertura no Inovasaun ba Inovasaun Abilidade.”
Seminariu nee ho objetivu atu aselera transformasaun dijital iha Timor-Leste liu husi aproveita teknolojia nuudar fundasaun ba inovasaun no dezenvolvimentu abilidade dijital, partikularmente iha edukasaun.
Nuudar pasu ida atu apoia Planeamentu Dijital Estratejiku 2032 Timor Leste nian, MTK iha kompromisu tomak atu apoia literasia dijital entre jerasaun sira iha setor edukasaun. Liutan, seminariu nee reprezenta manifestasaun konkreta ida hosi kolaborasaun entre MTK ho Ministeriu Edukasaun Timor Leste.
Iha biban nee Benedictus Ardiyanto Priyo, CEO Telkomcel iha Timor Leste ba STL, iha CCD Segunda (25/08/2025) hatete, Governu liu husi Ministeriu Transporte no Komunikasaun hamutuk ho Telkomcel iha Timor Leste konvida Google husi Indonezia realiza konferensia, hamutuk ho Ministeriu Edukasaun no professor no estudante sira oinsa fo hanoin kona ba uza Dizital iha Timor Leste.
“Ida nee hanesan Komitmentu Telkomcel nia atu apoiu Governu Timor Leste oinsa hasae mundu dizital iha Timor Leste, ida nee assuntu neebe mak importante,” katak CEO Telkomcel nee.
Nia dehan, Telkomcel nafatin komprometidu atu sai parseiru estratejiku ba governu hodi apoia transformasaun dijital, partikularmente iha dezenvolvimentu nasaun nia talentu dijital. Telekomcel dezenvolvimentu rekursu umanu hanesan aspetu krusial ida hodi dudu transformasaun dijital. Tanba nee, investimentu sira Telkomcel nian laos deit foka ba infraestrutura, maibe mos ba hadia kapasidade no abilidade sira hosi joven sira Timor Leste nian hodi nunee sira bele kompete iha nível mundial.
Nunee mos Ministru Transporte no Komunikasaun, Miguel Marques Manetelu hatutan, liu husi kolaborasaun bele loke tan oportunidade ba inovasaun.
“Liu husi kolaborasaun nee, ami hakarak loke tan oportunidade sira ba inovasaun no hametin kapasidade dijital nasaun nian”, hatete governante nee.
Nunee mos Ministra Edukasaun (ME), Dulce De Jesus Soares hatete, edukasaun hanesan fundasaun ba dezenvolvimentu nasional.
“Edukasaun hanesan fundasaun ba dezenvolvimentu nasional. Ho kolaborasaun nee, ami iha kompromisu atu ekipa Timor Leste nia jerasaun foin-sae sira ho abilidade dijital, nunee sira sei laos deit sai utilizador ba teknolojia maibe sai mos kriador ba inovasaun”, dehan ME, Dulce.
(eme)
