DILI, STLTIMORLESTE.com – Ministru Transporte no Komunikasaun (MTK), Miguel Marques Gonçalves Manetelu konfesa nia la hatene no laiha konhesimentu kona-ba desizaun Autoridade Portuariu Timor Leste Institutu Publiku (APORTIL, I.P) hapara ka la estende kontratu tripulante Timoroan nain 8 iha Roo Berlin Ramelau ho Roo Berlin Nakroma.
“MTK la hapara ema tripulante, sira servisu iha neeba nee sira mak hatama no sira mak hasai, see mak hapara ema, sira iha autonomia finanseiru no administrativa no patrimonial, neebe sira mak jere iha APORTIL,“ dehan Ministru MTK, Miguel Manetelu ba jornalista sira hafoin partisipa enkontru iha Konselhu Ministru (KM) iha Palasiu Governu, Kuarta (19/03/2025).
Nia akresenta katak, too ohin loron nia seidauk hatene kauza husi hapara tripulante Timoroan nain 8 nee, no nia parte sei hein relatoriu husi APORTIL Dili.
“Ita la hatene, osan la too mak hasai ema ga halo nusa, tanba saida nee hau la hatene, hau presiza hetan relatoriu nee lai, tanba too ohin loron hau seidauk hetan relatoriu, entaun hau seidauk bele halo komentariu,” afirma MTK, Miguel Manetelu.
Antes nee Xefe Bankada Partidu Libertasaun Popular (PLP), Maria Angelina Sarmento mak levanta kestaun nee iha Parlamentu Nasional liu husi ninia intervensaun iha plenaria, hatoo nia preokupasaun ba tripulante nain 8 neebe durante nee servisu iha Roo Berlin Nakroma no Ramelau hapara hotu no rekruta hotu fali tripulante sira husi Indonezia mak mai kaer Roo sira nee.
“Iha deit Timoroan ida ka rua mak tama hamutuk ho tripulante Indonezia no Timoroan nain 8 nee sira hapara hotu sira nia kontratu, nee pergunta tanba saida mak tenke hapara,” lia husuk husi Deputada PLP, Maria Angelina Sarmento.
Nia akresenta, durante nee rekrutamentu ba ema sira servisu iha Roo Berlin Nakroma ho Roo Berlin Ramelau nee, rekrutamentu feixadu no la aberta ba publiku, tripulante Timoroan sira dehan sei fo sai rekrutamentu nee aberta karik sira mos prontu atu konkore.
Too notisia nee hatun STL seidauk halo konfirmasaun ho parte Prezidente APORTIL Dili.
(jos)
