BAUKAU, STLTIMORLESTE.com – Relasiona mudansa klimatika neebe akontese iha tinan nee, afeta ba populasaun iha Suku Kaikua, Postu Administrativu Vemasi, Munisipiu Baukau, sei sofre hamlaha iha tinan nee, tanba batar mate no bee ba natar laiha.
Xefe Suku Kaikua Anibal Henrique da Costa esplika, iha epoka nee komunidade agrikultores Suku Kaikua hetan ajuda fila rai ho traktor husi Servisu Munisipal Agrikultura Baukau hamutuk hektare 150 resin iha neebe komunidade sira kuaze kuda ona produtu lokal sira hanesan batar no seluk tan, maibe sei laiha rezultadu diak, tanba produtu hirak neebe komunitariu agrikultor Suku Kaikua kuda kauze mate.
“Situasaun ho mudansa klimatika neebe tinan ida nee hasoru liu liu iha hau nia Suku rasik tinan ida nee hau nia komunidade sei afeta hamlaha, tanba komunidade barak mak moris ho vida agrikultura, maibe udan been la diak batar mate hotu,” hateten Anibal ba jornalista sira iha Sentru Konvensoens Vila Antiga Baukau, Segunda (02/02/2026).
Nia sublina, aliende batar mate komunidade agrikultores sira neebe halo servisu iha natar laran kuaze reativa hotu natar hirak neebe tinan barak abandona no daudaun taka ona kabubu iha parte balu kuaze traktor fila ona rai no parte balu halo ona viveiru hare, maibe bee sira iha natar laran hahu maran, tanba laiha bee.
Nia komenta, natar sira neebe iha Suku Kaikua no Suku vizinhu sira iha Postu Vemasi, dutante nee asesu bee husi mota, maibe impaktu husi mudansa klimatika rezulta mota Vemasi maran dekor neebe labele fo asesu bee ba natar sira, tanba nee husu Governu atu tau matan ba komunidade Suku Kaikua neebe daudaun infrente problema kauza husi mudansa klimatika.
“Hau hatoo ba Ministeriu kompetente se bele tau matan ba hau nia komunidade, tanba laos komunidade mak baruk halo toos no halo natar, maibe tanba mudansa klimatika nee mak afeta, liu liu ba Ministeriu Solidariedade Sosial apoiu ba komunidade sira,” Anibal rekomenda.
Autoridade Suku Kaikua nee rekoinhese, daudaun Ministeriu Agrikultura Pekuaria Peskas no Floresta liu husi kompanhia daudaun sei halo konstrusaun irigasaun iha mota Vemasi neebe ho intensaun atu fo asesu bee ba natar sira iha Suku Kaikua no natar sira iha Suku seluk, maibe sei labele responde fornese bee ba natar sira, tanba bainhira mudansa klimatika udan been menus laiha bee iha mota refere atu kanaliza ba natar sira.
Nia sujere ba Ministeriu Agrikultura Pekuaria Peskas no Floresta aliende konstrui irigasaun, konstrui mos fatin propriu ida atu akumula udan been iha kualker tempu nunee bainhira udan laiha no mota maran bele foti bee husi fatin refere fo asesu ba natar sira.
Entretantu Suku Kaikua iha Aldeia 2 mak hanesan Aldeia Kaikua no Bahamori ho total polupasaun 1.972 husi uma kain 476 neebe maioria moris vida agrikultura.
(tom)
