LAUTEM, STLTIMORLESTE.com – Komunidade iha Com, Postu Administrativa Lautem, Munisipiu Lautem senti tristi, tanba mudansa klimatika estraga sira nia animal no produtu.
“Ita haree situasaun mudansa klimatika halo udan laiha no tuun la tuir nia tempu, entaun bailoron naruk impaktu ba animal sira, hanesan kuda, karau, bibi sira mate, produtu lokal hanesan batar, fehuk, talas no seluk mos maran hotu,” dehan estrutura asuntu Sosial ba Suku Com, Postu Administrativu Lautém, Munisipiu Lautém, Carmelinda da Silva ba jornalista sira iha Suku Com, Segunda (18/11/2024).
Nia dehan, iha Suku Com kompostu husi aldeia neen (6) hanesan Iraonu, Pitileti, Etepiti, Vailovaia, Muapusu, Lohomato, komunidade barak sente triste ba mudansa klimatika, tanba halo udan la tuun, entaun animal no produtu lokal sira mos kondisaun la saudavel ka mate.
Tanba husi kondisaun mudansa klimatika halo ai-horis barak mate, udan laiha, bailoron naruk, produtu lokal sira mos la moris, halo animal sira, karauk ka kuda mate hotu, entaun impaktu sira nee mak daudaun nee afeta hela ba komunidade sira iha Suku Com.
“Ita hatene katak mudansa klimatika nee mai husi natureza, halo bailoron naruk, udan laiha, entaun komunidade sira mos labele halo toos, impaktu nee boot tebes ba komunidade, tanba oan sira nia eskola, nesesidade uma laran, lori animal ba faan hafoin sustenta oan sira, ikus animal sira mos mate hotu,” nia sublina.
Iha fati seluk, komunidade iha Suku Com, Aldeia Muapusu, Aderito dos Santos hatete, kondisaun mudansa klimatika nee mai husi natureza, atu halo udan tuun ka bai loron naruk nee depende natureza.
Maibe ohin loron Mudansa Klimatika halo ai-horis barak mate, komunidade barak husik hela nia produtu lokal sira, hanesan batar, lakeru, fehun, tanba bailoron naruk, estraga, mate hotu no animal sira mos mate hotu.
Mudansa klimatika daudaun nee boot tebes, halo bee barak sai maran, ai-horis sira mate hotu, kuda, karau, bibi, mate hotu, entaun ekonomia neebe uza hodi sustenta familia laiha, tanba nee husu ba Governu no parte relevante sira atu hanoin hamutuk oinsa bele rezolve mudansa Klimatika.
Entretantu komunidade Aldeia Etepiti, Francisca Tavares Gomes afirma, mudansa klimatika nee parte estragus ida hodi impata nesesidade komunidade nian, hanesan ba kuda no kolheta.
Tanba baratar neebe komunidade kuda presiza foti nia isin, maibe Mudansa Klimatika, entaun produtu lokal sira mate hotu, tanba bailoron naruk, udan laiha, halo duut mos mate hotu.
(EST 1)
