DILI, STLTIMORLESTE.com – Maluk Musulmanu sira iha mundu tomak inklui Timor Leste (TL) sei finaliza jejum iha loron 30 Marsu 2025.
“Ami sei selebra loron Idul Fitri iha loron Segunda 31 Marsu 2025, nee hanesan loron vitoria ba ami islamiku hafoin halao jejum Ramadhan. Ami nia preparasaun atu selebra loron vitoria ida nee hanesan baibain kada tinan, primeiru ami halao orasaun iha Sholat tip iha Kampung Alor Dili, depois ida nee ami sei halibur malu nuudar familia boot Musulmanu, ami halao al-bihalal nomos ami sei halo vizita husi uma ba uma, ida nee hanesan doutrina obrigasaun ida ba ami para oinsa atu hametin relasaun familia Musulmanu hanesan silaturahmi ba maluk sira,” dehan Visi Prezidente Konselhu Nasional Islamiku Timor Leste (KNITL), Inacio Antonio Soares ba jornalista STL iha Mesjid Annur Kampung Alor, Sesta lokraik (28/03/2025).
Nia haktuir tan katak, selebra loron Idulfitri laiha preprasaun ida neebe mak diak, prinsipalmente iha selebrasaun loron Idulfitri nee sai ona tradisaun ka kultura ba maluk Musulmanu nian, depois de finaliza jejum selebra loron Idulfitri no Ramadhan nian.
“Kada tinan sempre ita hetan mos lia menon husi ita nia membru governu sira iha nasaun Timor Leste (TL) nomos mai husi kolega, belun husi lider relijioza sira seluk neebe sira fo neebe fo lia menon ba loron boot nee. Liu husi loron boot Idulfitri, hau nuudar lideransa ba relijiaun Musulmanu iha TL, apela deit ba hau nia komunidade sira, oinsa kria moris harmonia iha sosiedade nuudar Timoroan, maske ita iha diferente iha kultura relijiaun maibe ita presiza moris hamutuk, lao hamutuk no presiza fo tulun ba malu, presiza konsidera malu. Diferente diversidade nasaun, kada diversidade laos obstaklu no laos problema, maibe hanesan rikusoin boot ida mai ita, atu oinsa, ita konsidera no respeita malu,” dehan Visi Prezidente KNITL.
Iha oportunidade hanesan, Konselheru KNITL, Boabentura Soares dehan, fulan Ramadhan hanesan fulan jejum neebe kada tinan sempre halao dala ida, maibe nia data ho fulan nee mak fariavel, iha tinan 2025 monu iha fulan Marsu no tinan 2026 sei monu iha fulan Abril.
“Durante fulan Ramadhan ami jejum, fulan ida neebe la nakait ho kultu, maibe halai liu ba fulan ida neebe hakbesik aan ba Nai Maromak, Efata Allah, tanba ita durante nee servisu, dala ruma buat barak mak ita halo sala, relasaun ida neebe mak besik liu mak hakbesik aan ba Maromak, ida nee relasaun vertikal neebe mak importante, tanba ita moris iha mundu nee, ita fiar katak ema ida mak atur ita, fo dalan mai ita, entaun ami islam, Aulha Suwata Allah nee mak sumber ba ita nia moris kultur. Ho nunee ami Islam buka hatetuk ida nee uluk, hatetuk ita nia fiar ba Maromak, segundu halo relasaun hosidental, ida nee importante, tanba Nai Maromak hatete, o bele adora Maromak liu buat hotu-hotu, o bele fiar nia maibe ohin loron o nia feen, la hadomi o nia oan, o nia adorasaun nee nuudar sinal, labele bale buat ida,” dehan nia.
Nia dehan, iha kontekstu ida nee, islam hanorin atu relasaun vertikal no horizontal nee labele kotu, liu-liu relasaun familia hanesan sosiedade ida neebe kiik liu iha sosiedade nia leet, familia tenke diak para eziste iha familia uma laran, moris tenke iha dame no harmonia, tenke hakbesik aan ba Maromak, tanba Maromak mak sei fo bensaun familia.
“Kuandu familia moris iha pas, dame no harmonia mak Maromak sei bensa mai ita, haraik ba ita dalan loos, loke ita nia hanoin no Maromak fo perdaun mai ita liu husi penitensia neebe mak ita halo loron-loron, saida mak ita halo, ita tenke halo konfisaun ba Maromak, hau tenke halo ezame konsiensia ba hau nia feen no oan iha uma laran, ida nee mak importante liu, depois mak ba ema seluk iha sosiedade hanesan iha familia vizinhu sira, iha relasaun domin, relasaun justisa nian, relasaun ba osan neebe mak ita gasta loron-loron, kontekstu Ramadhan nee luan demais,” dehan nia.
Nia dehan, durante fulan ida nia laran la haan no hemu durante loron tomak, nuudar ema umana dala ruma iha frakeza barak, tanba tentasaun barak, dala ruma hasai lia fuan neebe la monu iha maluk seluk sira nia hakarak, tenke sempurnakan liu husi hasai osan izmola ida bolu dehan zakat fitra, fo ba kada individu.
“Kada familia, ema ida tenke fo izmola zakat fitra, hanesan hau nia familia ema nain 5, ema ida tenke fo izmola zakat fitra, ida nee obrigatoriu iha familia laran, ho intensaun atu hamoos fila fali ninia Zakat fitra, hanesan ita ema karik foin moris fila fali, aleinde ida nee ita mos fo tan buat seluk hanesan sedekah ho zakat mal, maibe paling inti mak familia,” dehan nia.
Nia haktuir tan katak, atu realiza loron idulfitri, iha komisaun ida neebe loron-loron simu hahan, bainhira loke jejum ka loke puasa.
“Ita iha loraik bainhira loke jejum ka puasa sempre hatama hahan, para fo han maluk sira neebe mak jejum, oferese ai-haan nee husi familia islamiku nee asaun oferese ai-haan ho voluntariu ho intensaun atu hadia ninia lalaok moris loron-loron nian, nunee mos sasan neebe mak ita rekolha nee fo ba ema kiak sira. Iha 4 golongan manusia neebe maka ita fo hanesan ema kiak, ema kbiit laek sira, maluk sira iha orfonatu sira ou ema neebe moris vulneravel liu, tenke fo ai-haan ba sira, neebe programa ida nee durante jejum iha fulan ida nia laran sempre halao programa sira nee,” afirma nia.
Nia haktuir tan katak, atividade durante fulan ida nia laran sempre halao asaun karidade ba maluk sira neebe mak presiza ai-haan sira nee.
Iha oportunidade hanesan, Sity Mariaty dehan, durante fulan Ramadhan besik remata ona, sira sempre halao asaun karidade, uza osan rasik hodi tein ai-haan produtu Timor nian, faan aifuan halo minuman hanesan jus fore rai, dosi, rujak, es buah no seluk oferes ba masjid, ba maluk sira neebe mak lokraik mai loke jejum enzun iha mesjid Annur Kampung Alor.
“Atividade ida nee ami halao durante fulan ida nia laran deit, liu tiha ida nee ami sei la faan ona, tanba nee iha fulan Ramadhan nee ka durante fulan jejum nian neebe besik remata ona, kuaze ami hetan osan ho montante US$ 1000 resin ona no osan nee sei oferese ba maluk sira neebe presiza no sei jere husi lideransa maluk musulmanu,” afirma nia.
Tuir observasaun STL iha Mesjid Annur iha Kampung Alor Dili, maluk Musulmanu sira balun mai loke jejum, balun simu ai-haan neebe oferese ba maluk sira neebe loke jejum iha loraik, nunee mos feto maluk sira husi musulmanu, faan sira nia produtu iha estrada ibun hodi halibur osan durante fulan ida nia laran atu apoiu maluk sira seluk neebe presiza tulun.
(jos)
