BAUKAU, STLTIMORLESTE.com – Relasiona informasaun neebe espalha iha media sosial katak, ema deskonhesidu tenta naok labarik iha Suku Loilubu, Postu Administrativu Vemasi, Munisipiu Baukau, nee la loos.
Informasaun refere espalha iha loron 18 Abril 2025 parte meudia.
“Informasaun nee laloos, nee negosiu manu no maun nee husu ba alin kiik oan nee katak, iha nee faan manu ka lae, nunee alin nee hatan la iha, entaun maun nee mos hateten halimar ba alin nee, entaun imi faan ema ka lae, alin kiik nee tauk halai ba fo hatene ba nia papa no pama, nia papa telefone ba komunidade sira duni tuir maun nee,” hateten Administradora Postu Vemasi, Elda Maria Viegas de Sousa Freitas ba STL liu husi telefone Segunda nee (21/04/2025).
Nia sublina, hafoin komunidade sira duni tuir sidadaun refere konsege kaer hodi baku hafoin kontaktu ba Autoridade Seguransa inklui Suku no Postu hodi rezolve tuir familia.
Nunee mos Komandante Interinu Komando Polisia Munisipiu Baukau, Superintendente João Sancho Pires informa, sidadaun neebe komunidade Loilubu deskonfia naok labarik iha Suku Buibau, Postu Baukau Vila nee la loos, maibe buka manu atu sosa no laiha intensaun atu naok labarik, maibe ikus mai polemika iha media sosial.
Nia informa, kazu espalha iha media sosial naok labarik dala tolu ona akontese iha Munisipiu Baukau, dahuluk iha Suku Uakala Postu Baguia, Suku Triloka Baukau Vila no Suku Loilubu Vemasi, maibe iha kazu rua informasaun la loos, tanba liu husi investigasaun provas hatudu kazu seluk, enkuantu kazu Triloka Polisia kontinua buka tuir autor.
Nuune ba oin Komando Polisia Munisipiu Baukau sei la tolera pesoal neebe lansa informasaun la tuir akontesimentu iha terenu ba publiku, sei identifika hodi submete ba prosesu investigasaun, tanba hamosu paniku iha publiku.
“Ba oin hanesan nee ita bolu mai presta deklarasaun, tanba lei fo dalan, se mak halimar buat nee Polisia sei la tolera nunee preve situasaun, ita lakohi fali halimar buat la loos sai fali loos,” hateten João Sancho Pires.
Nia argumentu, atu evita informasaun laloos sira iha publiku, Komando Polisia Baukau sei esforsu liu husi Ofisial Polisiamentu Suku (OPS) no Konselhu Polisiamentu Komunitariu (KPK) sei implementa siensebeliza iha kada Suku, nunee bele eleva koinhesementu komunidade nian hodi lansa informasaun loos ba publiku.
Entretantu relasiona ema deskonhesidu neebe tenta atu naok labarik mane ida ho idade 06 iha area Suku Triloka Komando Polisia Baukau liu husi ekipa kontinua buka tuir autor.
(tom)
