DILI, STLTIMORLESTE.com – Polisia Nasional Timor Leste (PNTL) liu husi Servisu Informasaun Polisia Nasional (SIPN) kompostu husi Araña Leste, Araña Oeste junta Forsa Polisia, asegura joven mane nain tolu (3) neebe komete kazu naok motor iha Igreja Balide, wainhira sarani sira tuir hela misa kalan Natal iha loron 24 Dezembru 2024.
Ekipa servisu halo vizilansia durante semana ida nia laran no konsege kamat suspeitu JMS alias UBEN hamutuk ho evidensia iha liman laran wainhira utilija hela motor naok nee iha estrada diresaun Taibesi area Xina Rate nian. Hafoin halo inkeritu konsege identifika tan suspeitu nain 2 seluk neebe envolve iha kazu naok refere no ekipa servisu mos konsege buka too sira nia rezidensia hodi foti suspeitu hamutuk ho evidensia kapasete 2 tan.
Depois Suspeitu nain 3 nee ho naran inisial JMS alias Uben (17), JMM alias Aberek (19) ho suspeitu ida seluk ho naran SX alias Alelok (17), no sira nain 3 hela hotu iha Aldeia Paiol, Suku Lahane Osidental, Postu Administrativu Vera Cruz, Munisipiu Dili.
Iha fatin hanesan, suspeitu JMS nia deklarasaun katak, sira nain 3 rasik mak halo planu hodi naok ho inisiativa uza maneira sobu no dudu sai motor neebe para hela iha Igreja Balide, wainhira vitima para hela motor hodi ba tuir misa Natal. Hafoin naok motor sira mos konsege naok tan kapasete sarani sira nian hamutuk 4 neebe xave hela ho motor iha estrada ninin.
Entretantu, vitima Virgilio de Araujo Smith deklara, nia ba tuir misa kalan Natal nian iha Igreja Balide no para hela motor iha estrada ninin besik estasaun kombustivel kompanhia ETO nian, hafoin misa remata vitima sai mai buka motor ema naok ona.
“Hau hatoo agradese ba servisu vizilansia Komando Forsa rua, tanba nia motor hetan fali inklui nia dokumentu importante seluk neebe rai hela iha motor laran no husu atu kontinua buka tan motor seluk neebe lakon no seidauk hetan too agora,” nia esplika.
Entretantu ho deklarasaun husi suspeitu sira nomos vitima, Komandante SIPN hatun ona diretiva ba ekipa servisu hodi intensifika buka tuir autor sira seluk, neebe ho grupu oin-oin neebe envolve iha kazu naok motor iha kapital Dili no mos munisipiu seluk.
Oras nee daudaun Xefe Ekipa servisu entrega ona Suspeitu nain tolu (3), evidensia motor ida (1), kapaseti (2) ba Departamentu Investigasaun Kriminal Nasional (DIKN), hodi halo prosesu investigasaun no detein durante 72 oras tuir lei neebe iha, antes submete ba Tribunal hodi tuir porsesu julgamentu.
(jen)
