DILI, STLTIMORLESTE.com – Tribunal Judisial Primera Instansia Dili (TJPID) liu husi leitura akordaun, deside kondena arguidu nain rua (2) inisial NASF no CMAdC ho pena efetivu.
Iha leitura akordaun nee, Juiz prosesu Ersilia de Jesus deklara katak, iha sala julgamentu laran arguidu nain rua nega ba faktus neebe iha, katak laos sira maka naok telefone.
Juiza deklara, maske arguidu sira nega, maibe bazeia ba deklarasaun lezadu nia katak, momentu neeba lezadu la hare se maka foti lezadu nia sasan, maibe lezadu nia sasan lakon duni, hanesan telefone, speaker, no helem.
Tribunal intende katak, arguidu sira foti duni telefone, depois maka fo fali telefone seluk hodi taka.
Tanba nee Kolektivu la iha duvidas, konsidera faktus neebe konsta iha akuzasaun provadu hotu, tanba nee Tribunal deside kondena arguidu nain rua ho pena prizaun tinan lima, ba kada arguidu.
Tribunal mos husu arguidu nain rua, kada arguidu nain ida fo osan us 3.50 hamutuk 500 hodi sosa fali lezadu nia telefone foun ida.
Rona tiha desizaun, Tribunal mos husu ba arguidu nain rua, atu la aseita ho desizaun Tribunal nian, liu husi defeza atu halo rekursu durante prazu loron 30 nia laran.
Prosesu nee, lee husi Juiz prosesu Ersilia de Jesus, Ministeriu Publiku reprezenta husi Prokurador Bartolomeo de Araujo, no arguidu hetan asistensia legal husi Advogadu Privadu Agustinho.
“Iha akordaun nee, Tribunal kondena arguidu nain rua ba prizaun tinan lima, hanesan parte defeza la simu ho akordaun nee, tanba presu ba iha sasan sira nee la to ba iha krime Furtu Agravadu,” dehan nia ba STL Tersa (17/02/2026).
Nia hatutan, iha alegasaun husi parte defeza nian husu Tribunal atu halo alterasaun kualifikasaun juridiku ba krime neebe iha, maibe Tribunal sira entende oin seluk katak, arguidu sira iha ligasaun ba rede. No husi parte Ministeriu Publiku husu kada arguidu kondena tinan 4 prizaun.
Esplika, Tribunal mos husu atu selu indimizasaun konaba folin husi telefone nian, maibe defeza sei hato ida nee liu husi rekursu sira nian.
Tuir akuzasaun katak, iha loron 4 fulan Marsu tinan 2025, mais ou menus oras tuku 00:00 OTL dader madrugada, arguidu NASF ho CMAdC foti naok lezadu BFN nia iphone 11 ida kor mean ho folin USS 1.100, speaker rua ho folin US$ 100, no kapaste NHK ida ho folin US$ 20.00.
Iha altura neebe lezadu kondisaun lanu, kondusa motor husi diresaun My Friend atu ba Hali Laran. Tanba lezadu lanu todan nunee, para tiha motorizada iha dalan ninin, hodi latan an iha brongon leten, no nia pasta neebe telemovel iha laran rai iha sorin, iha estrada publiku ponte my frend diresaun atu ba estasaun kombustivel ETO Halilaran.
Lezadu la iha konhesimentu iha momentu arguidu nain rua foti naok sasan sira nee, maibe testamuna Arcanjo, Antonio no Nizio maka kaer toman arguidu nain rua. Arguidu nain rua mos envolve iha kazu ida, neebe investiga separadu. Sasan neebe arguidu sira naok ho folin total US$ 1.220.
Tanba nee, Ministeriu Publiku akuza arguidu nain rua hanesan autor material ho forma konsumadu ba krime Furtu Agravadu neebe previstu iha artigu 252 husi Kodigu Penal.
(ter)
