DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial JdCG, tanba komete krime Burla agravadu.
Tuir akuzasaun neebe iha katak, iha loron 12 fulan Maiu tinan 2023, iha oras tuku 3:30 madrugada, lezada KAM toba hela iha nia kuartu iha Lahane.
Katak antes lezada toba hamate tiha lezada nia telefone no tau hela iha sumasu okos.
Lezada toba hela, derepente naroman ida lakan kona nia matan, halo lezada hakfodak haree arguidu hamriik hela besik janela, ho ida nee halo lezada tauk hakilar no halai ses husi fatin neebe lezada toba ba.
Iha dader lezada ba aprezenta keixa iha Polisia no Polisia mai detein arguidu. Lezada mos foti kedas telefone neebe arguidu foti.
Konsekuensia husi arguidu nia hahalok nee, halo lezada tauk hodi ba hatoo keixa.
Tanba nee Ministeriu Publiku akuza arguidu komete krime Furtu Agravadu neebe previstu iha artigu 250 husi Kodigu Penal.
Hatan ba akuzasaun nee, arguidu hili direitu nonok, tanba nee Tribunal kontinua rona deklarasaun husi lezada.
Lezada deklara katak, lezada konhese arguidu tanba sira sei iha relasaun familia.
Lezada deklara, momentu neeba lezada toba hela, no arguidu tama ba iha kuartu laran lezada ho kondisaun la sadar aan, arguidu foti tiha telefone no halai sai husi janela.
Lezada deklara, telefone neebe arguidu foti, iha momentu neeba polisia haruka arguidu entrega kedan telemovel ba lezada.
Rona tiha lezada, Tribunal haree katak la prienxe ba iha krime Burla Agravadu, tanba nee Tribunal konfirma ba iha lezada katak, kuandu halo alterasaun ba iha krime nee lezada aseita atu perdua arguidu ka lae. Lezada deklara perdua ona arguidu.
Iha alegasaun Prokurador deklara katak, telemovel arguidu entrega ona, sira sei relasaun familia, tanba nee husu Tribunal atu apresia ba deklarasaun sira neebe iha.
Aleinde nee, defeza mos husu Tribunal atu apresia ba deklarasaun sira neebe iha.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz, Jumiati Frietas, Jose Gonsalves, Juiz estajiadu nain ida, Ministeriu Publiku reprezenta husi Prokurador Domingos Bareto, arguidu hetan asistensia legal husi Defensor Publiku Anzelmo Akara.
(ter)
