DILI, STLTIMORLESTE.com – Ministeriu Publiku (MP) iha alegasaun ba krime Roubu, husu Tribunal atu aplika pena suspensaun ba arguidu nain tolu (3) ho insial DdA, FAdR no JdJC, tanba naok lezadu DBB nia telemovel.
Iha alegasaun MP neebe reprezenta husi Prokurador Bartolomeo de Araujo deklara katak, lezadu nia deklarasaun iha MP antes nee katak, lezadu ho arguidu sira sei relasaun kolega, tanba nee lezadu halo akordu hamutuk ho arguidu sira, no lezadu nia hakarak prosesu nee remata deit iha MP.
Prokurador deklara, maske lezadu iha hanoin hanesan nee, maibe atu halo prevensaun iha futuru, MP solisita ba iha Tribunal Koletivu atu aplika pena prizaun tinan 3 suspende tinan 3 ba arguidu nain tolu.
Enkuantu husi parte defeza nian, Defensor Publiku Manuel Sarmento husu Tribunal tetu sirkunstansia hotu, atu aplika justisa neebe justu ba arguidu nain tolu.
Rona tiha alegasaun, Tribunal adia ba loron seluk hodi rona desizaun.
Iha indisus sufisiente katak, iha loron 27 fulan Julhu tinan 2023, besik tuku 09:00, ofendidu DBB konhesidu ho naran “David” konduz motorizada atu fila ba nia uma husi estrada diresaun mota Maloa nian.
Hafoin too iha mota Maloa nian, arguidu DdA, FAdR no JdJC ho motorizada marka Beat, kor metan no xapa matrikula T. 1179 TLS halai rabat ofendidu katak, arguidu JdJC imediata foti ofendidu nia telemovel marka Samsung A52, kor metan neebe sosa ho folin US$ 415.
Momentu neeba, ofendidu nia telemovel rai hela iha motorizada nia bolsu parte karuk, bainhira arguidu JdJC hadau tiha ofendidu nia telemovel, arguidu DdA lori nia ain tebe ofendidu no rezulta monu no projeta ba rai, rezulta ofendidu nia ain tuur parte loos kanek, liman sikun parte karuk hetan kanek, kanek iha kidan parte karuk no sente moras, maibe ofendidu la ba halo tratamentu iha hospital.
Hafoin ofendidu monu tiha, suspeitu DdA, FAdR no JdJC halai kedas husi fatin akontesimentu diresaun ba Ponte Maloa nian, no xapa matrikula parte kotuk husi motorizada neebe suspeitu sira uza monu hela tiha.
Konsekuensia direta no nesesaria husi konduta arguidu DdA, FAdA no JdJC nian, rezulta ofendidu sofre tiha prejuizu patrimonial, nunee mos ofende tiha nia korpu no saude.
Arguidu DdA, FAdR no JdJC halo buat hirak nee ho forma livre, deliberada no konsiente, konjugasaun esforsu no vontade iha ezekusaun planu ho objetivu atu prejudika no ofende ofendidu nia saude no korpu, nunee mos ho propozitu ba apropriasaun telemovel ofendidu nian.
Arguidu DdA, FAdR no SMRC hatene katak sira nia hahalok no aktu sira nee lei bandu no kastigu, biar nunee arguidu sira nafatin halo asaun sira nee.
Ho hahalok sira nee arguidu DdA, FAdR no JdJC nuudar ko-autoria material ba Krime Roubu, previstu iha artigu 253 husi Kodigu Penal.
Audensia julgamentu nee prezide husi Juiz Koletivu, Zulmira Auxiladora, Arjentino Nunes, Ivan Patrocenio, Ministeriu Publiku reprezenta husi Prokurador Bartolomeo de Araujo, arguidu sira hetan asistensia legal husi Defensor Publiku Manuel Sarmento.
(ter)
