DILI, STLTIMORLESTE.com – Sekretariadu g7+ hamutuk ho Ministeriu Negosiu Estranjeiru no Kooperasaun Timor Leste sei simu bainaka nasaun 13, hodi partisipa iha reniaun Ministerial Organizasaun Internasional g7+ ba dala 6, neebe mak sei realiza iha Sentru Konvensaun Dili.
Serimonia Reniaun Ministerial nee sei partisipa husi Nasaun 13 inklui Timor Leste, neebe mak halao iha loron 11 too 12 fulan Abril tinan nee, serimonia abertura husi Prezidente Republika, Jose Ramos Horta, iha Sentru Konvesaun Dili no halao diskusaun ministerial iha Hotel Palm Spring Dili.
Sekretariu Jeral g7+, Helder da Costa hatete, Timor Leste sai uma nain ba eventu enkontru Ministerial g7+ ba dala 6 no sei partisipa husi nasaun 14.
“Ohin ita halo konfrensia, ida nee ho objetivu atu informa ba publiku iha teritoriu Timor Leste no mos iha rai liur kona-ba eventu reniaun ministerial G7+ nian neebe sei halao iha Dili, hahu husi Loron 11 too 12 fulan Abril tinan nee,” hateten Sekretariu Jeral g7+, Helder da Costa iha sede Sekretariadu g7+, Tersa (08/04/25).
Sekretariu nee informa, bainaka sira husi rai liur too Iha Timor Leste, iha loron Sesta loraik, neebe mak dezloka mai husi nasaun Singapura hamutuk Nasaun 13 ho aviaun Aero Dili.
Enkuantu hola parte iha eventu reniaun ministerial nee hamutuk nasaun 14 neebe mai husi nivel ministru nain rua visi ministru nain lima, emabaixador nain 5 envia mos Ministeriu Negosiu Estranjeiru sira.
Helder salienta katak, objetivu husi Reniaun Ministerial nee atu selebra tinan 15 ezistensia g7+ no Timor Leste hanesan Nasaun Fundador, iha reniaun ministerial nee realiza ba dala 6 nian.
“Objetivu fundamental ba reniaun nee iha buat tolu, ida atu halo revosaun ba progresu no alkansa neebe mak atinje ona durante tinan 15 no iha mos konsolida iha nivel ministerial no atu trasa estratéjia ka mata dalan roteiru ba tinan 10 ka 15 oin mai,” hateten Helder.
Iha fatin hanesan, Ministeriu Negosiu Estranjeiru no Kooperasaun (MNEK), Bendito Freitas hateten, Konselhu Ministerial g7+ nee importante tebes, tanba partisipa Timor Leste ba iha g7+ ho mekanizmu ida hodi hatur nasaun Timor Leste iha mundu internasional hodi marka katak, Timor mos partisipa atu lori rezolusaun ba iha problemas konflitus globais liu husi partisipasaun iha mundu internasional .
“Importante tebes-tebes reniaun Konselhu Ministerial g7+ neebe mak halo iha Dili nee perkursu ida naruk durante tinan 15 organizasaun intergovernamental nee funda iha Timor Leste, presizamente tinan 15 mai halo VI konferensia inter-ministerial nee, ida nee hatudu katak Timor apeja de kiik ona maibe nia lian iha mundu,” MNEK, Bendito.
Entretantu nasaun 14 neebbe mak sei partisipa iha eventu reniaun Ministerial g7+ nee mai husi Nasaun Afganitaun, Burundi, Republika Sentral Afrikana, Chade, Costa do Marfim, Guinea-Bissau, Haiti, Liberia, São Tome Prinsipe, Ilhas Salomão, Aerra Leone, Somalia no Sudão do sul.
(EST 3)
