DILI, STLTIMORLESTE.com – Nasaun 6 husi Comunidade dos Países de Língua Portuguesa (CPLP) konfirmadu partisipa iha Jogu Xadres CPLP neebe hahu iha Segunda loraik, iha tuku 15:00 ho kategoria 3.
Kestaun nee hatoo husi Prezidente Federasaun Xadres Timor Leste, Zeferino Viegas Tilman ba jornalista sira, bainhira remata realiza meeting iha CCD, Segunda nee (21/07/2025).
Nia hatete, Federasaun Xadres Timor Leste realiza teknikal meeting ba modalidade Xadres iha CPLP hodi deside katak Jogu Xadrez hahu iha Segunda loraik.
Nasaun 6 husi CPLP neebe mak partisipa iha jogu Xadrez mak hanesan Angola, Cabo Verde, Portugal, Moçambique, Sao Tome no Timor Leste, no jogu nee ho kategoria 3 mak hanesan Classical, Rapid, Blisse.
“Ohin ita realiza ona tennikal meeting, ami koalia liu kona-ba Xadres, neebe molok nee ami fahe ba nasaun neen (6) mak Angola, Cabo Verde, Portugal, Moçambique, Sao Tome no Timor Leste, neebe sei partisipa iha jogu nee no ohin sira konfirma asuntu balun iha ligasaun ho atleta sira husi nasaun 6 neebe mak partisipa iha jogu CPLP nee,” dehan Prezidente Federasaun Xadres Timor Leste, Zeferino Viegas Tilman ba jornalista sira iha Centro Convenções Dili (CCD), Segunda (21/07).
Prezidente Federasaun dehan, ohin halo sorteu jogador sira neebe mak sei kompete ba kategoria 3 Classical, Rapid, Blisse, neebe jogu CPLP nee sei kompete.
“Kategori Blisse nee jogu ekipa ita mos halo ona sorteiu depois ida nee sorteu iha ona orsida hatuur jogador ida neebe mak hasoru ida neebe depois husi sorteiu sei hatuur iha sistema depois orsida ita iha lista jogador neebe hasoru malu,” katak nia.
Nia hatete, jogu nee hahu iha Segunda 21 too iha 25 dader, no sorteiu iha teknikal meeting nee ho numeru deit.
No jogu abertura iha tuku 15:00 sei hahu uluk ho kategoria Standar ba Femenino no Masculino.
Tanba saida Jogu Xadres muda fali iha 21 Julhu, tanba orariu neebe mak fahe ona lo-loos joga iha 22 Julhu, hatan ba kestaun nee Prezidente hatete tuir orariu neebe fahe ona publiku katak jogu Xadres ohin 21 Julhu jogu teknikal meeting deit 22 Julhu mak hahu joga, maibe tanba iha jogu 3 kedas no kada kategoria nee joga dala 5 jogador hanesan joga Standar, Classical, depois sei kontinua ba jogu rapid no Blisse entai jere tempu fo todan demais ba jogador sira, tanba nee ikus mai konkorda ho manual neebe ajusta hodi bele joga ohin.
Regulamentu neebe distribui ona ba nasaun partisipante sira inklui konfirma naran atleta sira neebe sei kompete hamutuk 14 husi nasaun neen (6) mak Portugal, Angola, Cabo Verde, São Tome Principe, Mosambike inklui Timor Leste, nia relata.
Regra Xadres iha jogu Desportivu CPLP ba kategoria tolu nee fahe ba Rapid ho durasaun minutu 15, Blisse ho durasaun minutu 5 no standar mak minutu 60.
Ba jogu nee rasik prepara ona arbitru nain sia (9) no hetan apoiu tan arbitru nain haat (4) husi Portugal, Cabo Verde no Angola. Sira sei servisu kolaborativamente husi 21 ate 25 Julhu inklui ba serimonia medalha nian. Fasilidade ba jogu xadrez nee rasik hetan apoiu tomak husi Federasaun Xadrez Internasionál (FIDE), iha kolaborasaun ho FXTL no Federasaun Xadrez Cabo Verde. Apoiu nee inklui fornesimentu ekipamentu xadrez konjuntu (set) 10, neebe sei rai iha Timor Leste hodi uza iha kompetisaun sira iha futuru,” nia afirma.
Ekipa prepara kedas fatin jogu ho meza neen (6). Kada meza iha ona set ida ho kadeira tolu neebe sei prienxe husi jogador no arbitrajen. Durante jogu sei la autoriza pesoal hotu halo movimentu, nunee partisipante sira bele iha konsentrasaun masimu.
(eme)
