DILI, STLTIMORLESTE.com – Natal nuudar Kosok Oan Jesus Kristus moris, mai lori domin no dame bá familia idak-idak, tanba nee sidadaun hotu presiza kria pas no estabilidade.
Mensajen nee hatoo husi Xefi Bankada CNRT, Duarte Nunes ba STL liu husi telefone iha Dili, Kuarta (25/12/2024).
Nia katak, hanesan Timoroan no hanesan mos sarani Katoliku, maske diferensia relijiaun oin-oin, ksolok Natal ba hotu-hotu, selebra natal presiza kria pas no estabilidade.
“Kosok oan Jesus lori domin no dame mai ita hotu, tanba née mai ita idak-idak hanoin ba futuru, atu labele mete iha hemu tua, hodi halo problema. Tanba Natal neebé ita simu Kosok Oan ho domin no dame”, nia tenik.
Reprezentante povu nee hatete, klaru ke populasaun hotu hakarak selebra Natal nee ho ambiente ida hakmatek no favoravel, tanba iha selebrasaun née hamutuk ho familia sira hakarak kontente.
Selebrasaun loron Natal nee hamutuk ho familia atu haree durante tinan ida nia laran, buat balu presiza atu halo diak liu tan, karik buat balu halo la diak, presiza halo reflesaun, atu nunee hadia no haluha, hodi haree ba futuru.
Tuir nia, selebra Natal ho tinan foun nee labele hanoin katak moris nee ohin deit, maibe moris nee presiza hadia ba futuru, tanba nee natal lori pas no dame, hodi prepara fali ba tinan foun, espera katak Kosok Oan Jesus mai lori hakmatek ba familia idak-idak.
(gui)
