DILI, STLTIMORLESTE.com – Deputadu Kongresu Nasional Rekonstrusaun Timorense (CNRT), Natalino dos Santo preokupa tebes ho imigrante sira iha Timor Leste (TL), tanba nee husu ba imigrasaun tenke tau atensaun hodi kontrola.
“Hau nia preokupasaun nafatin husu imigrasaun atu kontrola ba ema sira neebe mai husi liur, ita haree kuaze Xina domina tiha Timor, sira nia entrada mai nee makaas tebes, tanba nee husu ba imigrasaun atu kontrola sira, hau foti kestaun ida nee fokus ba Governu atu tau atensaun liu-liu kontrola imigrante sira neebe tama mai hodi taka dalan ba Timoroan sira,” tenik Deputadu Natalino iha PN, Segunda (12/03/2025).
Deputadu nee haktuir, tuir informasaun neebe asesu aviaun voo direita Dili ba Xina barak tebes sira mai atu halo saida, mai atu halo investimentu ga, turista, ida nee preokupasaun liu ba populasaun sira neebe mak fo informasaun mai ami.
Iha fatin hanesan, Visi Ministru Asuntu Parlamentar, Aderito Hugo da Costa hatete, alterasaun ba lei imigrasaun nee iha semana kotuk Konselhu Ministru halo ona hodi responde ba pontus situasaun sira neebe sosiedade sira preokupa.
“Ita espera katak ministeriu relevante haree hela asuntu ida nee, ajustasaun ba alterasaun ba lei imigrasaun nian nee atu resposta ba pontus situasaun sira neebe mak ohin deputadu sira koalia sobre uzu pasaporte turistika nian atu halo atividade servisu,” katak Adrito Hugo.
Governante nee hatutan, ministeriu sei halo lei alterasaum ba imigrasaun hodi halo ajustamentu atu haforsa liu tan imigrasaun nasional hodi bele adapta ho situasun sira hanesan ohin aumenta sidadaun estranjeiru sira nia entrada.
(EST 2)
