AINARO, STLTIMORLESTE.com – Natar hamutuk hektare rihun 8 resin iha Munisipiu Ainaro abandona, tanba kondisaun irigasaun aat.
Diretora Servisu Munisipal Agrikultura Ainaro, Aguida Judit Mendonça esplika, bazeia ba dadus peskiza husi Ministeriu Agrikultura Pekuaria Peskas no Floresta hamutuk ho UNPD halao iha Ainaro tinan 2021 identifikadu ba ezistensia natar iha Munisipiu Ainaro hamutuk hektare rihun 9 neebe potensialidade ba produsaun hare, maibe daudaun husi natar hektare rihun 9 refere hektare 980 mak ativu ba produsaun hare enkuantu restu seluk abandona, tanba irigasaun aat.
“Ita agora book mak 980 nee seluk sei abandona hela kestaun tanba irigasaun la diak, tanba nee ita tenta hela hadia irigasaun sira neebe la diak,” Diretora Servisu Munisipal Agrikultura Ainaro, Aguida Judit Mendonça ba jornalista sira iha Jardim Ainaro Vila, Segunda (09/03/2026).
Diretor nee komenta, kauza irigasaun neebe aat hodi agrikultor sira abandona natar hektare rihun 8 resin nee fo impaktu ba Munisipiu Ainaro atu simu poder lokal, tanba kondisoens ida ba poder lokal prezisa mos numeru produsaun neebe diak.
Maibe daudaun Ministeriu Agrikultura Pekuaria Peskas liu husi diresaun servisu Munisipal no nafatin apoiu ekipamentus modernu ba setor agrikultura iha Munisipiu Ainaro hodi hasae numeru produsaun iha Ainaro ba implementasaun dezentralizasaun poder lokal.
“Ita hakarak iha poder lokal nee ita tenke esforsu duni hasae produsaun iha area agrikultura nian liu liu iha Munisipiu Ainaro,” Aguida argumenta.
Diretora nee katak, preokupasaun ba natar hektare rihun 8 resin neebe daudaun abandona iha Munisipiu Ainaro, Servisu Munisipal halo ona koordenasaun ho Ministeriu Agrikultura Pekuaria Peskas no Floresta atu responde.
(tom)
