BAUKAU, STLTIMORLESTE.com – Epoka kultiva tinan 2024 nian, natar potensial hamutuk hektare 8.476 iha Munisipiu Baukau abandona.
Diretor Servisu Ministeriu Agrikultura Munisipiu Baukau, Agostinho Ximenes esplika, natar potensial eziste iha Munisipiu Baukau neebe rejistu husi agrikultura Munisipal hamutuk hektare 14.423, maibe iha periodu 2024 nee, hektare 5.947 deit mak halo kultivasaun, enkuantu hektare 8.476 abandona.
“Nia impaktu irigasaun balun mak seidauk hadia i kauza mos ita nia mudansa klimatika, tanba udan bee menus, bee mos menus, entaun ita nia natar barak mak sei abandona,” hateten Agostinho ba STL iha knaar fatin Vila Nova, Kinta (24/10/2024).
Nia sublina, relasiona ho kondisaun irigasaun aat neebe implika ba natar sira abandona, tanba la asesu bee, parte Agrikultura Munisipal iha ona konkordansia entre Ministeriu, neebe tuir planu sei halo konstrusaun ba irigasaun Uatuwa no sei oferese bee ba natar sira eziste iha Suku Samalari, Seical inklui Buruma no Kaibada neebe daudaun balun abandona.
Nomos natar neebe eziste iha Postu Kelikai no Baguia abandona, tanba kauza husi impkatu klimatiku husi udan been neebe menus, tanba laiha irigasaun.
Iha fatin ketak, Xefe Suku Soba, Postu Administrativu Laga, Francisca Monica de Fatima mos relata, epoka kultivasaun hare kulit nian iha tinan 2024, natar hamutuk hektare 20 resin iha Suku refere abandona, tanba laiha bee.
“Natar iha nee utiliza udan been deit, entaun politika Governu liu husi Ministeriu Agrikultura mak tenke tau osan boot ba setor nee, hodi halo barajen kaptasaun udan been, nunee udan been laiha bele oferese bee husi barajen nee ba natar,” rekomenda Monica.
Nia konsidera, natar komunidade nian neebe abandona kada tinan iha Suku Soba, nee fo impkatu ba rendimentu ekonomia familia, tanba laiha produsaun hanesan hare kulit atu garante iha periodu folin foos neebe daudaun sae iha merkadu.
(EST 2)
