DILI, STLTIMORLESTE.com – Institutu Nasional Kombate HIV-SIDA (INCSIDA) halao seminariu sensibiliza informasaun kona-ba moras HIV-SIDA nian, hodi fo hanoin ba estudante AHHA EDUCATION SOLS atu halo prevensaun ba moras HIV-SIDA iha sira nia moris loron-loron.
Prezidente INCSIDA, Daniel Marcal hatete, organizasaun SOLS iha munisipiu hotu-hotu iha, depois SOLS nee sira halibur juventude Timoroan barak tebes, no barak sai ona ba rai liu hodi servisu no hadia moris.
“Ita haree joven sira husi munisipiu mai hotu iha SOLS nee, depois iha joven barak mos hanesan sira nee, moris susar tanba sira iha moras HIV-SIDA iha sira nia isin, joven barak livre nee kestaun domin, no joven sira nee fasil tebes hodi moris hamutuk hanesan feen ho laen, tanba nee estraga sira nia mehi no futuru ba loron aban nian, tanba nee ita mai oinsa atu enkoraja sira, atu mentaliza sira ho liafuan sira neebe mak bele transforma sira nia hanoin, transforma sira nia mentalidade para sai joven ida neebe solidu,” hatete Prezidente INCSIDA, Daniel Marcal.
Nia esplika, joven sira nia pensamentu, nee joven barak sira barak monu ba seksu livre no kaben lalais, depois barak hetan moras HIV. Joven sira nee barak, maibe sira asegura sira nia futuru loron aban nee, sira luta ba futuru loron aban nian, maibe sira monu iha dalan klaran tanba deit sira nia gostu.
“Inan aman buka meus hodi buka osan hodi selu sira nia eskola, sira nia kursu, maibe ita haree joven sira monu iha dalan klaran, tanba tuir sira nia gostu, hodi seksu livre too ikus kona HIV-SIDA, depois destroi sira nia futuru,” nia informa.
Nia deklara, Governu koloka orsamentu ba INCSIDA oinsa halibur joven sira atu nunee koalia barak kona-ba moras HIV-SIDA nee ba sira.
Iha fatin hanesan, Formadora husi AHHA EDUCATION SOLS,
Inocência Do Rosário Quintas esplika, INCSIDA fahe informasaun kona-ba HIV-SIDA ba estudante AHHA EDUCATION SOLS, hodi bele komprede diak liu tan kona-ba moras HIV-SIDA refere.
(jen)
