BAUKAU, STLTIMORLESTE.com – Negosiante Ambulante ida husi Munisipiu Bobobaro neebe mate iha Postu Administrativu Venilale, Munisipiu Baukau, tanba moras kompikadu.
Informasaun nee haktuir husi Komadante Komando Polisia Munisipiu Baukau, Superintendente Xefe Polisia, Antonio Maria De Sa ba jornalista sira iha Vila Nova, Segunda (18/11/2024).
“Kazu ligadu mate iha Venilale nee laos ema mak oho, maibe nia mate tanba moras tuir deklarasaun Doutor nian iha klinika Venilale,” hatete komandante nee.
Superintendente Xefe Polisia nee esplika, sidadaun refere nuudar negosiante Ambulante neebe halo negosiu hamutuk sira aluga uma iha area Edemumu Suku UatuHako, hodi halo negosiu iha Postu Venilale.
Tuir investigasaun, sidadaun refere iha loron 16 Novembru 2024 parte dader iha ona sintoma hanesan isin manas, maibe nafatin obriga aan hodi lao ba faan sasan, nunee too parte loraik too fali fatin deskansa ho iis boot, nunee konsege lori ba Sentru Saude Venilale, maibe la konsege salva nia vida, tanba sofre moras Cianosis Distal Pupita no Dilatado.
“Iha loron 17 kalan nee kedas matebian transporta ona ho karreta funeral ba ona Munisipiu Bobobaro entrega ba familia sira halo serimonia funebre,” dehan nia.
Matebian refere ho identidade Sabino Dinis, idade 23, husi Munisipiu Bobobaro, Postu Administrativu Malelat, Suku Leber.
(EST 2)
