BAUKAU, STLTIMORLESTE.com – Negosiante sira iha merkadu foun Tuanau Baukau, kada loron sosa bee litru rihun 10 husi bombeiru sira faan bee iha Munisipiu Baukau hafoin utiliza ba nesesidade, tanba bee neebe Bee Timor Leste Empreza Publiku (BTL,EP) fornese kada loron la sufisiente.
Kondutor kareta bombeiru faan bee ba negosiante sira iha merkadu Tuanau, Mateus Soares de Jesus sente kontente, tanba negosiante sira iha merkadu Tuanau kada loron sosa bee ho folin US$ 1.00 ba kada bidon, neebe kada loron negosiante sira sempre sosa.
“Hau faan ba sira bidon ida US$ 1.00, tanki ida litru 5.000, loron-loron hau faan tanki rua ba sira hamutuk litru rihun 10, hau mai faan sira merkadu laran tomak sosa,” hateten Mateus ba jornalista STL iha Tuanau, Kuarta (18/06/2025).
Nia argumentu, bee litru rihun 10 neebe faan ba negosiante sira hetan osan US$ 24.00 kada loron husi negosiante sira iha merkadu Tuanau.
Negosiante faan modo Joana Pereira sente triste, tanba kada loron la hetan rendimentu diak, maibe obrigatoriu tenke hasai osan US$ 1.00 hodi sosa bee utiliza ba fase modo no seluk tan, tanba bee neebe BTL oferese liu husi kanalizasaun durante nee la sufisiente.
“Iha nee durante ami sosa bee, tanba bee laiha, bee liga mai duni, maibe ointuan deit, ami barak uza la too, nunee loron ida ami sosa bee bidon ida US$ 1.00, hodi rega ba modo tahan, fase modo tahan sira para moos ema sosa,” negosiante Joana konta.
Nia kompara, durante merkadu seidauk muda nafatin faan iha merkadu tuan Vila Nova hetan rendimentu diak no la sosa bee, maibe daudaun obrigatoriu tenke sosa bee, tanba bee neebe BTL formese la sufisiente.
Negosiate nee husu BTL atu fornese bee dala haat kada semana ho volume neebe sufisiente, tanba daudaun nee fornese bee semana ida dala rua ho volume neebe kiik, difikulta negosiante sira atu utiliza.
Hatan ba kestaun nee, Koordenadora Bee Timor Leste Empreza Publiku Baukau, Adriana Belo da Rosa hateten, BTL oferese bee ba merkadu Tuanau semana ida dala haat, kada loron oferese bee too oras tolu ho linha distribuisaun bee utiliza polegada rua, neebe sufisiente hela ba negosiante sira utiliza, maibe problema mak Diresaun Jestaun Merkadu Munisipiu Baukau laiha jestaun diak atu maneja hodi fo vantajen ba negosiante sira iha merkadu Tuanau.
“Bee neebe ami oferese ba merkadu Tuanau ho linha distribuisaun dois polegadas kada loron oras tolu, maibe seidauk too oras tolu tanki reservatariu iha merkadu nakonu tiha ona, prezisa hadia jestaun, entaun hadia rezervatoriu nee depois distribui,” Andriana Sujere.
Nia fundamenta, BTL fornese bee ba merkadu Tuanau kada semana dala haat, mak iha loron Segunda, Kuarta, Kinta no Sabadu neebe kada loron oras tolu, maibe nafatin difikulta negosiante sira, tanba problema iha jestaun merkadu nian.
Nunee husu Diresaun Jestaun Merkadu Munisipiu Baukau atu tau atensaun ba asuntu nee nunee fo vantajen ba negosiante sira iha merkadu Tuanau lalika halerik ba bee.
Entretantu negosiante neebe rejistu halao negosiu iha merkadu foun Tuanau Baukau hamutuk 900 resin.
(tom)
