BAUKAU, STLTIMORLESTE.com – Negosiante sira iha merkadu Munisipal Baukau kestiona eis merkadu Vila Nova no Beskem neebe daudaun nee nakonu ho duut.
Negosiante Olinda dos Santos hateten, politika Autoridade Munisipiu Baukau muda negosiante sira husi eis merkadu Vila Nova no Beskem ba merkadu Munisipal Baukau iha rohan tinan 2024, neebe objetivu prinsipal iha politika muda negosiante atu hamamuk fatin nunee iha espasu ba prosesu reabilitasaun estrada urbana Baukau Vila no estabelese infraestrutura seluk tan neebe bele priese iha politika dezenvolvimentu, maibe too ona tinan 2 fatin eis merkadu Vila Nova no Beskem nakonu ho duut.
“Dezenvolvimentu abandona agora duut mak naruk iha laran, sira dehan ami sai husi nee halo buat hotu iha laran, maibe agora seidauk ami husu mak ida nee deit,” hateten negosiante Olinda dos Santos ba jornalista sira iha eis merkadu Vila Antiga, Sesta (23/01/2026).
Negosiante nee mos katak, iha Autoridade Munisipal kontinua promete muda negosiante husi merkadu Vila Antiga sei transforma fatin refere ba jardim.
“Nee mak ami dehan, merkadu ida sira sobu uluk iha neeba seidauk iha dezentendimentu agora duut mak nakonu iha laran, maibe mai muda tan ami iha kuak laran nee atu halo saida iha laran, nee mak sira dehan atu halo jardim iha laran, tebes ga lae sira halo jardim iha laran,” Olinda komenta.
Iha fatin hanesan, negosiante Jacinta Ximenes konsidera, transforma merkadu Vila Antiga ba fatin jardim sei laiha rendimentu diak ba nasaun, maibe diak liu transforma ba mini merkadu hodi kada fulan negosiante sira selu arendamentu ba estadu.
“Ami husu, se bele karik estadu harii mini merkadu iha kota lama ami vendedores bele tur fulan fulan selu pajak ba estadu, tanba fatin kota baru agora duut mak nakonu iha laran,” nia rekomenda.
Liga asuntu nee STL tenta konfirma Prezidente Autoridade Munisipiu Baukau, maibe laiha fatin atu fo komentariu.
(tom)
