BAUKAU, STLTIMORLESTE.com – Negosiante Vila Nova konsidera Autoridade Munisipiu Baukau ansi muda negosiante sira husi merkadu tuan Vila Nova no Vila Antiga ba merkadu foun Tuanau.
Negosiante tipu negosiu roupa loja, Crispin Filipe Soares esplika, mezmu politika Autoridade Munisipal inisia ona enkontru ho negosiante sira iha Vila Nova no Vila Antiga kona-ba muda merkadu, neebe fo ona orientasaun ba negosiante sira atu idak-idak prepara fatin baraka iha merkadu foun, maibe fatin neebe negosiante sira ho voluntariu idak-idak prepara seidauk remata, tanba fiziku foin atinji 25%, maibe fo ona orientasaun hodi muda ba merkadu foun.
“Ami koopera, maibe ami nia fatin nee prepara too hotu mak ami sae mai, maibe agora hanesan nee, iha nee difikuldade barak, maibe sae ona mai nee, nee ansi,” hatete Crispin Filipe Soares ba jornalista sira, iha merkadu foun, Kuarta (20/11/2024).
Nia fundamenta, material neebe uza hodi konstrui baraka, husi ateru rai mutin, kalen, besi no seluk tan, kada negosiante sira sosa rasik laiha apoiu husi Governu, nunee negosiante kiik sira balun seidauk iha finansial atu sosa meterial hodi konstrui prepara baraka, maibe hahu ona muda sira husi merkadu tuan.
No kondisaun neebe prezisa Autoridade Munisipiu liu husi Jestaun Merkadu atu haree iha fatin merkadu foun mak hanesan fatin ba lixu, fatin saneamentu no estrada, tanba lixu fatin no saneamentu neebe antes estabelese ona seidauk sufisiente, enkauntu estrada husi Vila Nova ba merkadu refere mos sei kondisaun aat, neebe sei fo impkatu ba transporte sira sei la halo movimentu too merkadu refere.
Ligadu asuntu nee, STL tenta konfirma Diretor Servisu Jestaun Merkadu Baukau, maibe laiha fatin atu fo komentariu.
Tuir observasaun STL nian iha terenu nota katak, negosiante sira daudaun iha merkadu foun Tuanau balu kontinua harii sira nia baraka hanesan taka kalen, balun foin tau riin, balun foin hamoos fatin.
Enkauntu loron aban kinta feira komunidade sira husi nivel Suku no Postu sei faan sira nia produtu lokal sira iha merkadu, maibe negosiante sira kontinua preokupa haloot sasan iha fatin merkadu tuan atu lori ba merkadu foun, maibe negosiante neebe iha loron 19 horiseik muda uluk ona ba merkadu foun, ohin seidauk halao negosiu iha merkadu refere, tanba kontinua okupadu ho harii sira nia baraka.
Tuir orariu muda negosiante sira husi merkadu tuan ba merkadu foun hahu husi loron 19-23 Novembru 2024.
Negosiante neebe muda ba merkadu foun hamutuk 879, ho tipu negosiu obralan 148, roupa loja 125, faan sapatu 87, sembako 146, sasan dapur 54, kolisaun 10, alfateh 14, faan sana rai 3, Tais Timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba Agrikultura nian 1, Farmasia 1, Faan naan karun no seluk tan 10, faan ikan 23, Produtu lokal 200,no mini restorante 7.
Husi negosiante numeru refere neebe halo nia baraka rasik prontu ona atu utiliza ba negosiu 500, baraka neebe halo maibe sei metade 157, no 222 seidauk halo nia baraka.
(EST 2)
