BAUKAU, STLTIMORLESTE.com – Negosiante sira kontinua faan iha merkadu Vila Antiga, Postu Administrativu Baukau Vila, Munisipiu Baukau.
Negosiante Juleta Ximenes haktuir, iha tinan kotuk ekipa konjunta husi Autoridade Munisipiu Baukau sobu ona baraka negosiu husi negosiante sira iha merkadu Vila Antiga hodi muda halo negosiu iha merkadu foun Tuanau, maibe too iha merkadu foun refere laiha fatin negosiu, nunee deside fila hodi kontinua halo negosiu iha merkadu Vila Antiga too agora.
“Sira agora mai avizu hela deit fatin nee bandu ona, dehan labele faan iha nee, maibe ami nee mos povu Timor, hateten netik liafuan ruma mai, ami nia fatin iha neebe,” hateten Juleta ba STL iha Vila Antiga, Segunda (10/02/225).
Negosiante Juleta sublina, ekipa konjunta husi Autoridade Munisipiu Baukau too ohin loron kontinua avizu ba negosiante sira iha merkadu Vila Antiga atu labele halo negosiu, tanba bandu, maibe negosiu sira ezije sei kontinua faan iha merkadu Vila Antiga, tanba fatin ba sira iha merkadu foun Autoridade Munisipiu liu husi Jestaun Merkadu seidauk indika ba negosiante sira atu halo negosiu.
“Se dehan fatin nee bandu hatudu fatin mai ami, ami prontu ba ateru mesak hodi halo negosiu, tanba ami nia kabun no ami nia oan sira eskola, maibe duni deit ami fatin laiha, ami la aseita atu sai,” Juleta tenik
Enkuantu negosiante Maria Pinto realsa, antes atu muda negosiante sira iha merkadu Vila Antiga ba merkadu foun Tuanau, ekipa Jestaun Merkadu Munisipiu Baukau halo ona rejistu fatin ba negosiante sira iha Vila Antiga neebe kada negosiante ida rejistu fatin ho osan US$ 2.00, maibe hafoin atu koloka negosiante ba merkadu foun, laiha fatin ba sira atu halo negosiu, tanba fatin neebe atu koloko sira okupa ona husi negosiante seluk.
“Too agora sira seidauk hatudu fatin mai ami, maibe avizu deit dehan atu ba merkadu foun, ami sei tuur iha nee, bainhira fatin ba ami seidauk iha merkadu foun neeba,” hateten Maria Pinto.
Negosiante Vila Antiga husu ba Autoridade Munisipiu Baukau liu husi Diresaun Servisu Jestaun Merkadu atu hatudu fatin negosiu ba sira iha merkadu foun, nunee bele voluntariu hodi ateru, harii baraka ba negosiu nian, maibe sei la hatudu fatin, sei kontinua okupa eis merkadu Vila Antiga hodi halo negosiu.
Liga asuntu nee jornalista STL tenta konfirma Diretor Servisu Jestaun Merkadu Munisipiu Baukau, maibe laiha fatin atu fo komentariu.
Tuir observasaun jornslista STL nian iha terrenu nota katak, iha loron hirak liu ba ekipa konjunta husi Autoridade Munisipiu Baukau kontinua ezekuta despeizu administrativu ba hela fatin komunidade balu besik area merkadu Vila Antiga, neebe fo impaktu ba negosiante sira nia negosiu, tanba taka dalan, maibe daudaun negosiu iha merkadu Vila Antiga kontinua lao hanesan baibain, mezmu negosiante sira laiha baraka, tuur deit iha loron laran, no balu utiliza sumbrinha hodi satan loron nia manas.
(EST 2)
