DILI, STLTIMORLESTE.com – Negosiante Dilva F. S. Alves hatoo agradese ba Prezidente Republika (PR) Jose Ramos Horta neebe loke Night Market iha Palasiu Prezidensia, hodi promove sira nia produtu lokal.
Negosiante Dilva F. S. Alves, husi Dili, inan ho oan nain rua. Ninia atividade loron-loron inklui serbisu uma-laran no atividade negosiu kiik sira, hanesan faan etu kinur (nasi kuning) no ai-han tradisionál sira iha estrada ninin, liuliu besik eskola sira sente kontente no hatoo agradese ba Prezidente loke Night Market Promove Produtu Lokal.
“Hau agradese tebes ba oportunidade ida nee, liu-lil liu husi programa Empoderamentu Ekonomia Feto (EEF) neebe fo ona oportunidade ida nee mai hau, hau mos kontente no agradese tebes ba Sr. Prezidente Jose Ramos-Horta neebe suporta ona ami, liu-liu Inan feto sira neebe ho mikro negosiu” dehan nia liu husi komunikadu neebe STL asesu husi media PR Segunda (17/11/2025).
Prezidensia Republika loke Ai-Han Timor Night Market sei loke ba kalan festival tolu ho ai-han, muzika, no kultura, halibur emprezariu lokal, artista, no komunidade sira hodi selebra sabor neebe riku no kriatividade Timor nian. Eventu nee halao iha Palasio Prezidensial Nicolau Lobato husi loron 14–16 de Novembru tinan 2025, nuudar inisiativa kolaborativa ida entre Gabinete Prezidente Republika, Ministeriu Komersiu no Industria (MCI), Sekretariu Estadu ba Igualdade (SEI), no Heineken TL. Ai-Han Timor Night Market nia objetivu atu promove produtu ai-han lokal, hakbiit negosiu kiik sira, no kria oportunidade merkadu foun ba emprezariu timoroan sira.
Promove Ai-han Lokal no Hakbiit Negosiu Kiik sira, Naran Ai-Han Timorneebe signifika Hahan Timor nianrefleta misaun prinsipal hosi inisiativa nee atu fo apoiu ba produtor no vendedor ai-han lokal sira liuhusi ligasaun diretamente ho konsumidor, investidor no merkadu neebe luan liu.
Iha tinan kotuk emprezariu kiik 23 hetan rekrutamentu no formasaun iha programa Ai-Han Timor atu hasae sira-nia abilidade iha produsaun hahan, jestaun negosiu no marketing. Tinan ida-nee, foku mak promove benefisiariu sira-nee liuhusi fornese oportunidade atu demostra sira-nia produtu iha merkadu loloos liuhusi Ai-Han Timor Night Market.
Vendedor partisipante ida-idak hatudu inovasaun no reziliensia husi emprezariu kiik Timor oan sira, hodi oferese hahan autentiku, produtu kreativu, no interpretasaun moderna husi reseita tradisional neebe reflete identidade kulinaria TL nian.
Kolaborasaun no parseria sira, inisiativa Ai-Han Timor hatudu forsa kolaborasaun entre instituisaun publiku no privadu sira iha promosaun dezenvolvimentu ekonomiku inkluzivu. Liu husi ligasaun ajensia governu, organizasaun dezenvolvimentu no empresa privadu sira, Ai-Han Timor Night Market ajuda atu hametin kadeia valor lokal, apoia empreendedor sira, no hatudu Timor-Leste nuudar sentru turizmu kultural no kulinariu.
Esperiensia Merkadu ida neebe vibrante, vizitante sira bele goza mistura dinamiku ida husi tenda hahan nian, atuasaun muzika nian, animasaun husi DJ sira, teatru musikal no jogu no rifa sira ho premiu interesante, neebe kria atmosfera moris no atraktivu ba ema ho idade hotu-hotu. Ai-Han Timor Night Market dezeña hanesan espasu ida liga komunidade, selebrasaun kultura, no apoiu ba negosiu kiik sira neebe partikularmente feto sira mak sai nain ba negosiu refere.
Harii Futuru Sustentavel ba Emprezariu Lokal sira, Ai-Han Timor Night Market laos deit eventu kultura ida — maibe plataforma ida atu harii dezenvolvimentu sustentavel, hodi transforma talentu no paixaun lokal sai oportunidade ekonomika ba tempu naruk. Liuhusi vizibilidade, rede no asesu ba merkadu, inisiativa nee ajuda negosiu kiik Timor oan neebe feto lokal sira mak nain atu too susesu no kontribui ba moris urbanu neebe vibrante iha Díli.
Jornalista: Emerenciana Pinto
Editora: Domingas Gomes
