BAUKAU, STLTIMORLESTE.com – Negosiante merkadu foun Tuanau preokupa ho kondisaun estrada urbana, husi Vila Antiga-Vila Nova too iha merkadu foun Tuanau, tanba daudaun kondisaun aat no difikulta movimentu transporte too merkadu refere.
Tuir eis negosiante merkadu Beskem Vila Nova, daudaun faan iha merkadu Tuanau, Juleta Freitas katak, prosesu muda merkadu nuudar Baukau oan koopera tebes ho Autoridade Munisipiu Baukau nia desizaun, no desidi rasik husik fatin merkadu tuan ba faan iha merkadu Tuanau, nunee bele hetan rendimentu hodi kontinua sustenta ekonomia familia.
“Ami laos moris riku, maibe husi modo tahan futun ida mak hatutan ami nia moris, bemo ba mai selu 0.50 sentavus, selu 0.50 sentavus kondutor lakohi, entaun sasan ema la sosa, osan iha neebe mak atu selu bemo,” hatete Juleta ba STL iha merkadu Tuanau, Kinta (12/12/2024).
Tanba tuir nia, kondisaun neebe daudaun negosiante sira iha merkadu Tuanau enfrenta mak menus kompradores hodi sosa sira nia sasan, tanba merkadu refere dook husi komunidade sira nia hela fatin no kondisaun estrada husi rotunda Vila Nova ba merkadu refere kondisaun aat no grave hodi kauza kustu kada pasajeiru selu 0.25 sentavus sae ba 0.50 sentavus.
Husi kustu pasajeiru refere hamate vontade kompradores sira ba too iha merkadu hodi sosa sasan, tanba durante hahu negosiu iha merkadu foun too ohin loron kompradores menus tebes kompara ho durante sei halo negosiu iha Vila Nova.
Maibe sasan hanesan modo tahan sira neebe negosiante sira faan iha merkadu Tuanau, sosa tutan husi ema seluk, maibe obrigatoriu balun tenke estragus, tanba menus kompradores atu sosa ho lalais, nee konsidera dezisaun Autoridade Munisipal muda merkadu tenta atu oho negosiante sira.
Nunee husu Autoridade Munisipiu Baukau atu haree kondisaun estrada urbana iha merkadu Baukau Vila, liu-liu husi rotunda Vila Nova too merkadu foun, nunee bele fasilita transporte publiku mikrolete sira hodi reduz kustu pasajeiru husi 0.50 sentavus ba 0.25 sentavus.
Enkuantu kundotor Nuno Freitas hateten, kondisaun estrada urbana husi Vila Antiga ba Vila Nova too merkadu Tuanau presiza Governu fo atensaun, tanba daudaun kondisaun aat no grave, liu-liu tempu udan hamosu tahu.
“Ema dehan Baukau nee sidade segundu, maibe aspal ita haree kuak mak barak, husi bundaran nian sae ba merkadu foun ita baruk, tanba tahu barak iha tempu udan,” nia hatete.
Hatan ba kestaun sira nee, Prezidente Autoridade Munisipiu Baukau, Veneranda Lemos rekonhese kondisaun estrada urbana iha Baukau daudaun kondisaun aat no grave, maibe husi nasional hahu prosesu ona no tuir planu tinan 2025 sei halo reabilitasaun.
“Reabilitasaun estrada urbana hamutuk kilometru 23, se reabilitasaun estrada nee mak akontese, sei afeta mos ba maluk sira neebe hela iha dalan ninin, tanba nee hau apela ba Baukau oan hotu, sei ita hakarak haree sidade nee kapas ita tenke kontribui,” nia hatete.
(EST 2)
