BAUKAU, STLTIMORLESTE.com – Negosiante sira husi eis merkadu Vila Antiga utiliza resintu sede Suku Bahu ba atividade negosiu, tanba orienta husi Autoridade Suku.
Negosiante Juleta Ximenes haktuir, prosesu muda negosiante husi merkadu Vila Antiga ba merkadu Munisipal Baukau iha Tuanau, Autoridade Munisipal kompromete ona sei estabelese baraka negosiu ba kada negosiante iha merkadu Munisipal refere, maibe bainhira ekipa Jestaun Merkadu Munisipal Baukau muda negosiante sira husi merkadu Vila Antiga ba merkadu Munisipal iha loron 23 Janeiru 2026, maibe merkadu Munisipal laiha kondisaun ba negosiante sira atu halao atividade negosiu, nunee Autoridade Suku Bahu, Postu Baukau Vila deside fo fatin ba negosiante sira halao negosiu iha resintu edifisiu Sede Suku Bahu.
“Lori ami ba fatin neeba la seguru ba ami depois tau ami iha kedas kotuk duut laran neeba, nee duni ami haree triste halai fila fali mai hatoo ba Xefe Suku, Xefe Suku dehan ba haree neeba hamoos tuur iha Suku nia oin, nee duni ami mai tuur iha nee, agrasede ba Xefe Suku simu ami tuur iha oituan nee,” hateten Juleta ba jornalista sira iha fatin negosiu resintu sede Suku Bahu nia oin, Segunda (26/01/2026).
Negosiante nee espresa sentimentu agradese ba Autoridade Suku Bahu, tanba fo ona espasu ba negosiante sira hodi mantein halo negosiu iha area Vila Antiga.
Nia katak, halo negosiu iha resintu sede Suku Bahu ho provizoriu deit, maibe nuudar meius ida fo hanoin ba Autoridade Munisipal atu kria mini merkadu iha area Vila Antiga.
“Xefe Suku simu ami tuur iha nee bainhira haree mini merkadu ruma ba ami, ami tuur, se ami atu ba leten la ba ona, tanba bosok ami dala haat ona, maibe fatin ba ami laiha,” Juleta komenta.
Iha fatin hanesan negosiante Maria Soares sublina, ezistensia merkadu iha Vila Antiga inisiu kedas husi tempu português too Timor ukun aan, tanba nee husu Governu atu kria mini merkadu iha Vila Antiga hodi substitui merkadu Vila Antiga.
“Atu ba leten ami la ba, ami husu konstrui ami nia mini merkadu ida ami uza mak selu mos la buat ida, tanba ami faan modo tahan maibe ba neeba sira muda fali ami ba kotuk nee mak ami lakohi ba,” katak Maria Soares.
Enkuantu kompradores Luiza Martinha de Sousa konsidera, area Vila Antiga prezisa Autoridade Munisipal instala merkadu ida, nunee fasilita kompradores sira husi Suku Seiçal, Buruma, Kaibada, Bahu no Tirilolo balu, tanba besik liu kompara ba kompras iha merkadu Munisipal Baukau.
“Prezisa, tanba komprador laos iha kota lama nee deit, tanba komprador nee husi Tasi Diwake, Buruma, Kaibada Uaimua, Kaisidu mos dala ruma mai kompras iha nee, nee duni tuir ami nia hanoin kota lama tenke iha merkadu ida, tanba ami atu hola modo futu ida tenke ba fali kota baru, se ami osan iha US$ 5.00 selu tiha kareta PP US$ 1.00 entuan US$ 4.00 ami sosa sasan labele, nee duni kota lama hakarak ga lakohi merkadu tenke iha, ami lao dook sente labele,” dehan kompradores Luiza.
Kompradores nee mos katak, ezistensia merkadu iha area Vila Antiga laos akontese iha tempu ukun aan, maibe inisiu kedas husi tempu portuguesa too Timor ukun aan, tanba nee husu Governu atu konstrui merkadu estandar nasional ida iha area Vila Antiga nunee bele fasilita kompradores sira nia movimentu hodi garante sirkulasaun rodaviariu nian iha kapital Baukau.
Entretantu negosiante neebe dauduan halao negosiu iha resintu sede Suku Bahu hamutuk 36, liga asuntu nee STL tenta komfirma Xefe Suku Bahu, maibe laiha fatin atu fo komentariu, tanba halao hela servisu importante balu iha fatin seluk.
(tom)
