DILI, STLTIMORLESTE.com – Prezensa empreza no negosiante husi Xina kontinua aumenta makaas iha rai laran, hahu husi loja kiik too prejetu infraestrutura boot sira.
Fenumenu nee halo ema balun bolu hanesan tsunami ekonomiku, hodi hamosu diskusaun naruk kona-ba futuru kompetitividade negosiante Timoroan sira nian iha rai laran.
Tanba iha tinan ikus nee liu liu tama ba tinan 2026, influensia Xina nian laos deit ona iha konstrusaun neebe governu fasilita, maibe domina ona iha vida moris loron-loron nian, ezemplu mane Xina sira kaben ho feto Timor para fasilita halao atividade negosiu livre, hodi taka dalan ba negosiante Timoroan sira bele buka moris liu husi dalan negosiu.
Observador Politika, Jacinto Gaio liu husi entrevista hatete, negosiante Xina iha kapital boot no iha esperiensia neebe aas liu kompara ho setor privadu lokal ho negosiante Timoroan neebe sei iha faze dezenvolve sira nia aan.
“Ita kompara negosiante Xina ho ita nia setor privadu lokal ho negosiante Timoroan sira sei dook, tanba Xina mai ho kapital neebe boot laos kiik, neebe ita atu koalia ba mai mos ladun diak,” dehan Jacinto ba STL, iha Kaikoli, Dili, Kinta (12/02/2026).
Entretantu antes nee Prezidente Republika (PR), Jose Ramos Horta hatete, Timor Leste (TL) halao parseria ho Xina nee iha benefisiu ba ekonomia iha rai laran.
Tanba tuir nia Xina fo opsaun estratejiku barak liu ba TL atu dezenvolve nia rai, maski Timor Leste mos presiza matenek nunee labele depende deit ba nasaun sira husi liur.
(car)
