JOGJAKARTA, STLTIMORLESTE.com – Negosiasaun formal segunda ronda kona-ba Fronteira Maritima neebe halao iha Jogjakarta, lori satisfasaun ba ekipa negosiador husi Timor Leste (TL) ho Republika Indonezia (RI), tanba konsege koalia ba malu, simu ideia no iha vontade atu avansa ba etapa tuir mai.
Primeiru Ministru (PM), Kay Rala Xanana Gusmão observa katak durante prosesu negosiasaun iha ronda da-ruak nee ekipa husi parte rua hatudu vontade boot neebe hakarak tebtebes atu rezolve duni fronteira marítima rai rua nian.
“Hau labele koalia buat barbarak tanba formalmente ita foin hahu agora iha Jogjakarta. Nee duni, hau espera katak negosiasaun tuir mai iha fulan-Abríl, tinan oin sei bele dehan buat ruma. Hau labele dehan hau kontenti tebes maibe satisfeitu tanba ita haree katak ita bele koalia ba malu, bele simu ideias bá malu. Ida nee mak prinsipiu diak ida iha negosiasaun neebe difísil kona-ba fronteira marítima,” hatete PM Xanana liu husi nota komunikadu imprensa neebe STL asesu husi media Gabinete Primeiru Ministru, Kinta (11/12/2025).
Negosiasaun formal primeira ronda halao iha fulan-Agusto 2025, iha Dili no segunda ronda halao iha Jogjakarta. Ekipa konkorda ona atu kontinua negosiasaun formal tuir mai iha fulan Abríl 2026.
“Durante loron-rua ho balun nee diskusaun lao diak, ho abertura hosi parte Indonezia lidera husi Embaixador Amrih. Ita senti katak iha abertura, iha kooperasaun, iha duni vontade husi Governu Indonezia atu rezolve ita-nia fronteira maritima,” PM Xanana sublina.
Negosiasaun formal segunda ronda kona-ba Fronteira Marítima iha Jogjakarta hala’o durante loron-tolu (08-10 Setembru 2025) taka ho asina akta husi Xefe delegasaun nasaun rua nian, Timor Leste asina husi atuál Diretora Ezekutiva Gabinete Fronteira Terestre no Marítima (FTM), Elizabeth Exposto. Indonézia asina hosi Diretor Jeral Asuntu Jurídiku no Tratadu Internasionál sira, Ministeriu Negosiu Estranjeiru, Embaixador L. Amrih Jinangkung, iha The Phoenix Hotel, Jogjakarta, Indonézia, Kuarta (10/12/2025).
Rohan husi serimonia asinatura akta nee ekipa husi Timor Leste entrega tais, kafe Timor ho livru ba xefe delegegasaun Indonezia nian no foto hamutuk.
Jornalista: Alberto Menezes
Editora: Carme Ximenes
