NITIBE, STLTIMORLESTE.com – Organizasaun Lokal Bale Alekot Neo Oecusse (BANO) hamutuk ho Autoridade Rejiaun Administrativa Espesial Oecusse-Ambeno (RAEOA) reprezenta husi Diretor Rejional Administrasaun (DRA), Jose Tanesib Anuno ofisialmente inaugura bee moos iha Aldeia Kuantua Suku Usi Taku, Postu Administrativu Nitibe, Rejiaun Administrativa Espesial Oecusse-Ambeno (RAEOA).
Serimonia Inaugurasaun nee Hahu ho simu bainaka ho Lia dadoli (Takanab) husi Lia Nain suku Usi Taku, bidu husi labarik oan sira no Tara tais, nunee look buah malus maka vizita no tesi Vita Tanki Bee Sentru neebe konstrui husi NGO Bano, hetan finansiamentu husi NGO Internasional Caritas Australia ho fundu Osan US$ 10.000.
Diretor Rejional Administrasaun, Jose Tanesib Anuno lori governu Timor Leste (TL) no Autoridade RAEOA Nia naran hatoo obrigado Wain ba NGO Internasional Caritas Australia neebe aloka orsamentu Liu husi ONG Lokal BANO, konsege dada bee moos ba Komunidade Bairru Izoladu Kuantua ho Distansia 4 KM hakbesik bee moos ba povu iha Bairru Kuantua, Aldeia Kuantua ho total Uma kain 53 ho total Populasaun 373.
“Hau agradese ba Governu Australia Liu husi NGO Internasional Caritas Australia neebe aloka orsamentu Liu husi NGO Lokal BANO, konsege dada bee moos ba Komunidade Bairru Kuantua Aldeia Kuantua, Suku Usi Taku, Postu Administrativu Nitibe RAEOA. Husu ba Komunidade Bairru Kuantua atu konserva bee moos nee ba nesesidade imi nian iha Bairru Kuantua,” dehan Diretor Rejional Administrasaun Jose Tanesib Anuno ba STL hafoin inaugura bee Tanki Kuantua, Sesta (19/09/2025).
Iha biban nee, Rosa Perpetua Buquifai, nuudar Diretora NGO Lokal BANO, dehan durante nee Sira halao programa iha Oecusse, konsege identifika Bairru Kuantua hasoru difukuldade boot Liu maka bee moos, Sira atu asesu bee moos tenke Lao 4 KM too area Foho Nitibe Mak foin hetan bee moos.
“Husi Preokupasaun nee maka NGO Lokal BANO buka dalan Liu husi NGO Internasional Caritas Australia, konsege Apoiu fundu Osan hamutuk 10.000, konsege harii bee Tanki hamutuk Ida no profill bee hamutuk 2 nomos material maka dada bee moos nee ho Distansia 4 KM no halo mos torneira bee hamutuk 11 ba Uma kain 53,” dehan nia.
Iha biban nee Xefe Suku Usi Taku Hilariu Babo agradese ba Governu autoridade Rejiaun Administrativa Espesial Oecusse-Ambeno (RAEOA), hamutuk ho NGO Internasional Caritas Australia neebe aloka orsamentu Liu husi NGO Lokal BANO, konsege hakbesik bee moos ba Ninia povu no ohin inaugura ona bee moos nee.
“Hau lori Povu Suku Usi Taku Nia naran hatoo obrigado Wain ba governu Australia Liu husi NGO Internasional Caritas Australia neebe aloka orsamentu Liu husi NGO Lokal BANO, konsege dada ona bee moos ba Hau Nia komunidade Bairru Kuantua, Aldeia Kuantua Suku Usi Taku no ohin Autoridade RAEOA ho Parseiru no povu Kuantua inaugura ona,” dehan nia.
Arnoldus Name nuudar komunidade Kuantua, sente kontente tanba governu TL ho Parseiru NGO Internasional Caritas Australia ho Nia Parseiru Dezenvolvimentu husi NGO Lokal BANO konsege dada ona bee moos ba Komunidade Bairru Kuantua.
“Ami komunidade Kuantua hamutuk Uma kain 53 agradese ba Governu no Parseiru Dezenvolvimentu husi NGO Internasional Caritas Australia neebe aloka orsamentu Liu husi NGO Lokal BANO, konsege dada ona bee moos ba Ami komunidade iha Bairru nee. Iha istoria ukun rasik Aan foin primeirabes dada bee moos ba Ami komunidade iha Bairru Kuantua hetan ona bee moos,” dehan nia.
Tuir observasaun STL iha serimonia Inaugurasaun bee moos nee partisipa husi Diretor Rejional Administrasaun, Parseiru Dezenvolvimentu husi NGO Internasional Caritas Australia, Diretora NGO Lokal BANO, SAS, Agrikultura, pontu Fokal Administrasaun Nitibe, Ofisial Polisiamentu Suku no lia nain hamutuk ho Komunidade Bairru Kuantua, akompanhia direiramente inaugurasaun bee ho tesi vita no loke bee torneira.
Jornalista: Joseph Koa
Editor: Joseph Koa
