DILI, STLTIMORLESTE.com – Kandidatu Prezidente Federasaun Timor Leste (FFTL) ho numeru sorteiu ida (1), Nilton Gusmão eleitu ba Prezidente FFTL.
Nilton Gusmão eleitu ba Prezidente FFTL ho aklamasaun, tanba kandidatu Prezidente FFTL ho numeru sorteiu rua (2) desidi retira husi kandidatu Prezidente FFTL.
Nilton Gusmão eleitu ba Prezidente FFTL hodi kompleta deit mandatu restante durante tinan 1, hodi kompleta mandatu Prezidente FFTL periodu tinan 2022 too 2026.
Iha diskursu Prezidente eleitu FFTL, Nilton Gusmão hateten, nia sei asumi mandatu Prezidente FFTL durante tinan 1, maibe nia deklara sei ho konviksaun tomak atu hadia Futebol Timor Leste.
“Tempu neebe badak, se ema koalia karik ita ba atu halo saida, maibe iha nee ho onra no konviksaun tomak hau deside mai, maske tinan 1 deit, maibe hau sei investe hau nia rekursu tomak neebe iha atu nunee bele kontribui dezenvolve ita nia Futebol iha rai laran,” hatete Nilton Gusmão liu husi nia diskursu iha Salaun Hotel Novu Turizmu, Sabadu (11/01/2025).
Nilton Gusmão hatete, durante mandatu tinan 1 hamutuk ho asosiasaun futebol sira sei la halo milagre ida, maibe sei implementa programa neebe extraordinariu atu dezenvolve futebol Timor Leste.
“Ita sei la halo buat barak maibe ita sei halo buat ruma neebe extraordinaria tebes, ida mak sei reativa fali Liga Futebol Timor Leste no presiza iha dinamizmu foun no organizasaun foun atu bele organiza atividade regulares iha rai laran,” dehan Nilton.
Entretantu Nilton Gusmão mos kompromete sei fo atensaun espesial ba dezenvolvimentu ekipa futebol feto foinsae sira nian no formasaun ba treinador sira, arbitru sira no treinador sira futebol nian.
“Ita presiza kria oportunidade barak liu tan ba ita nia joven sira, husi filheira juvenil sira too futebol profisional. Importante mos atu promove kompetisaun juvenil sira iha nasaun laran tomak, hodi garante katak futebol too ba komunidade hotu-hotu no inspira jerasaun sira iha futuru,” hatete Nilton.
Aleinde nee pontu esensial seluk mak sei hametin asosiasaun futebol nian iha munisipiu sira, atu nunee sira bele hadia administrasaun Futebol nian iha sira nia rejiaun no promove atividade sira neebe envolve no inspira populasaun lokal. Presiza katak asosiasaun idak-idak iha kapasidade atu jere ninia atividade ho efisiensia atu nunee futebol bele dezenvolve ho maneira sustentável iha nasaun tomak.
Iha fatin hanesan, Kandidatu Prezidente FFTL) numeru rua (2), Estanislau Baptista deside rezigna aan husi nia kandidatu.
“Hau deklara rezigna aan husi hau nia kandidatu ba Prezidente FFTL,” hatete Estanislau Baptista.
Maibe Estanislau Baptista husu Prezidente eleitu FFTL atu implementa kompromisu durante mandatu tinan 1.
“Hau sei mobiliza hau nia maluk akademiku sira, atu akompanha karik promesa sira neebe fo sai husi maun Nilton Gusmão mak la implementa hau sei mobiliza ema atu kestiona ida nee,” realsa nia.
Iha biban nee, Domingos Caero eleitu mos ba membru ezekutivu FFTL, tanba kandidatu seluk Henrique Augusto deside rezigna aan.
Kongresu FFTL observa direita husi Asia Futebol Asosiation (AFC), Federations Internasional Futebol Asosiations (FIFA) no AFF.
(alb)
