DILI, STLTIMORLESTE.com – Federasaun Futebol Timor Leste (FFTL) liu husi Komite Independente anunsia katak, Nilton Gusmão sai hanesan kandidatu uniku ba Prezidente FFTL ba periodu 2026-2030, tanba kandidatu Prezidente FFTL, Francisco Jerónimo la prienxe kriteria neebe iha.
Porta Voz Komite Independente, Amandio Dos Santo hatete, rezultadu husi prosesu selesaun dokumentus proposta kandidatura ba membru ezekutivu FFTL, Kandidatura Prezidente, Vise Prezidente no membru Ezekutivu efetivu nain 5.
Nia dehan, Komite Independente eleito liu husi Kongressu Extraordinariu iha loron 26 fulan Outubru tinan 2024 no kontinua fo fiar hodi lidera prosesu Kongresu FFTL mandatu 2026-2030.
Tan nee bazeia ba Estatutu FFTL no Kodigu Eleitoral edisaun 2024, Komite Eleitoral Notifika ba Membru Assosiasaun sira iha loron 11 fulan dezembru 2025 (Estatutu FFTL Art. 32.2), hodi bele submete kandidatura potensia ba vaga Prezidente, Vise Prezidente no Membru Ezekutivu. Data limite kandidatura nian too loron 25 fulan Dezembru 2025, 24:00/00:00 OTL (Codigo Eleitoral FFTL, Art. 9.2).
Husi Prosesu nee fo tan prazu loron lima (5) nia laran hahu husi prazu submete formulariu kandidatura husi loron 26 fulan Dezembru – 30 fulan Dezembru 2025 (Codigo Eleitoral FFTL, Art. 9.3), Komite Eleitoral halo verifikasaun ba kandidatura sira nia proposta, kuandu seidauk kompletu bele kompleta dokumentus tuir prazu neebe determina.
Tan nee Komite Eleitoral fo tan loron tolu (3) entre loron 31 fulan dezembru 2025 too loron 02 fulan janeiru 2026 ba kandidatura sira atu kompleta sira nia proposta kandidatura, notifika e komunika.
Iha prosesu proposta kandidatura ba Membru Ezekutivu FFTL hanesan kandidatu Presidente FFTL, kandidatu vise presidente FFTL no membru Ezekutivu efetivu nain 5, proposta kandidatura submetidu hamutuk ema nain ualo (8), kandidatura ba presidente ema nain 2, kandidatura ba vise presidente nain I, kandidatura ba membru ezekutivu efetivu nain 5.
Haktuir ba Anexo A numeru 6) Komite Eleitoral entrega dokumentus kandidaturas hamutuk ema nain 8 ba Komite Auditoria no Konformidade no Komite etika no Disiplina hodi halo verifikasaun integridade, hodi haree kondidatura potensia hirak nee passa ba prosesu tuir mai ou lae.
Maibe hafoin komite rua halo verifikasaun integridade entrega ho akta verifikasaun, Komite Eleitoral halo Validasaun iha loron 08 fulan janeiru tinan 2026 molok pronunsia rezultadu kandidatura ba Publiku.
“Prosesu verifikasaun ida neebe rigorozu, transparente hodi halao tuir deit ba regulamentu neebe estipula ona iha Kodigu Eleitoral no Estatuto FFTL,” katak nia.
“Kandidatura hamutuk ema nain ualu (8) hanesan temi ona, Komite Independente pronunsiu rezultadu naran kandidatura sira neebe elejivel ba kongresu FFTL mandatu 2026-2030 mak hanesan tuir mai Kandidatura Prezidente FFTL neebe elejivel ba kongresu periodu 2026-2030 mak hanesan, Nilton Telmo Gusmão dos Santos,” hatete Portavos Komite Independente liu husi Konferensia Impprensa neebe halao iha Xanana Sport Centre, Sabadu (10/01/2026).
Nia hatutan, ho proposta kandidatura membru ezekutivu FFTL nee, kandidatu prezidente Francisco da Costa Jerónimo mak la prenxe rekejitus no konsidera eliminadu iha prosesu ida nee, maske Komite Independente notifika fo tan loron 3 hodi kompleta dokumentus esensial sira, mas too data determinadu la konsege resubmete.
Kandidatura Vise Presidente FFTL neebe elejivel ba kongresu periodu 2026-2030 mak hanesan Domingos Raul Falur Rate Laek.
Kandidatura ba Membru Ezekutivu FFTL neebe kompostu husi ema nain 5 neebe elejivel ba Kongresu periodu 2026-2030 mak hanesan, Domingos dos Santos Caeiro, Henrique da Costa, José Luis Oliveira, Faustino Godinho da Costa, Engrácia Pimentel Fernandes.
Nia reforsa liu tan katak, molok too Kongressu Ordinariu, Komite Independente sira sei Notifika Kandidatura potensial sira hodi prepara an molok Kongressu realiza.
“Hanesan temi ona, Komite Independente reafirma ninia kompromisu atu promove demokratizasaun no kontribui futebol hanesan meiu ba unifikasaun, dezenvolvimentu no orgulhu nasional. Hamutuk, Komite Independente sei kontinua atu fortalese prosesu ida nee no inspira amante futebol iha Timor Leste.
(alb)
